कोरियन साझेदारीमा सिमरा सेजमा एक अर्ब ३७ करोडमा केम्याक्स कस्मेटिक उद्योग खुल्दै

काठमाडौं। कोरियाली कम्पनीको रणनीतिक साझेदारीमा नेपालमा सौन्दर्य (कस्मेटिक प्रोडक्ट) सामाग्री उत्पादन हुने भएको छ।

नेपालको केम्याक्स हिमालय प्रालिमा कोरियन केम्याक्स कस्मेटिक्स कम्पनी लिमिटेडको रणनीतिक साझेदारी रुपमा प्रवेश भएको छ।

नेपाली कम्पनीले कोरियाली कम्पनीको ‘केम्याक्स’ ब्राण्डमा विभिन्न प्रकारका कस्मेटिक्स सामाग्रीहरु उत्पादन हुने भएको छ। केम्याक्स केरियाली कम्पनीको ब्राण्ड हो।

कोरियन कम्पनीले केम्याक्स हिमालयको ३३ प्रतिशतसम्म स्वामित्व खरिद गर्ने सहमति भएको छ।कस्मेटिक कारखाना बाराको सिमरामा रहेको विशेष आर्थिक क्षेत्र (सेज)मा राख्न काम सुरु भइसकेको छ।

कोरियन कम्पनीले कस्मेटिक सामाग्रीको गुणस्तर नियन्त्रण, प्रोडक्ट डिजाइन र अनुसन्धान तथा विकास (आर एन्ड डी) मा सहयोग गर्ने भएको छ।

केम्याक्स हिमालयका संस्थापकहरुको कस्मेटिक उत्पादन, वितरण र बजारीकरणमा दुई दशक लामो अनुभव रहेको छ। उनीहरुले ‘न्यूलूक’ ब्राण्डको कस्मेटिक सामाग्रीको उत्पादन तथा वितरण गर्दै आएका छन्।

कारखानको उत्पादन पूर्वाधार हाल निर्माणको चरणमा रहेको छ। हालसम्म २० प्रतिशत वित्तीय प्रगति भएको केम्याक्स हिमालयले जनाएको छ। उद्योग पूर्वाधार स्थापना गर्न एक अर्ब ३७ करोड ८० लाख रुपैयाँ लाग्ने अनुमान छ।

कूल लगानीमध्ये संस्थापकको स्वपुँजी (इक्विटी) २५ र बाँकी ७५ प्रतिशत बैंकको ऋण हुने गरी लगानी संरचना बनाइएको छ।

उद्योग आगामी सन् २०२७ को मध्यतिर सञ्चालनमा ल्याउने योजना रहेको केम्याक्स हिमालयले जनाएको छ। यद्यपि, उद्योग पूर्वाधार तयार पारेर उत्पादनमा जान समय लाग्ने भएकाले पनि लागत बढ्ने जोखिम कायमै छ।

नेपालमा कस्मेटिक सामाग्रीको बजार राम्रो रहेको छ। बढ्दो सहरीकरण, जीवनशैलीमा आएको परिवर्तन र स्किन सुरक्षामा थप चेतना बढेकाले नेपालमा कस्मेटिक सामाग्रीको राम्रो बजार देखिएको कम्पनीले जनाएको छ।

यद्यपि, नेपालमा विभिन्न लोकप्रिय विदेशी ब्राण्डका कस्मेटिकको रजगज रहेकाले केम्याक्स हिमालयनले तीव्र प्रतिस्पर्धाको सामना गर्नुपर्ने हुन्छ।

प्रतिस्पर्धाले उद्योगको मार्जिन घटाउन सक्ने संभावना छ। कोरियन ब्राण्ड हुने भएकाले बजारमा राम्रो हिस्सा ओगट्ने संभावना पनि छ।

बाराको सेजभित्र उद्योग सञ्चालन हुने भएकाले उत्पादन थालको चार वर्षसम्म कर छुट पाउनेछ। त्यसपछि ५० प्रतिशत कर छुट पाउनेछ। यस्तै उद्योगले स्याम्पुमा २० र अन्य कस्मेटिक उत्पादनहरुमा १५ प्रतिशत भन्सार सुरक्षा पाउनेछ।

केम्याक्स हिमालय सन् २०२३ मा स्थापना भएको हो। केम्याक्स हिमालयले स्किन केयर र हेयर केयरका लागि कस्मेटिक सामाग्री उत्पादन गर्नेछ।

जसअनुसार बडी लोसन, कस्मेटिक क्रिम, हेयर आयल, कस्मेटिक पाउडर, नङ पालिस, वाथ सोप र केम्याक्स स्याम्पु उत्पादन हुने उद्योगले जनाएको छ।

केम्याक्स हिमालयले एक अर्ब ५० करोड रुपैयाँ ऋणको रेटिङ गराएको छ।
ल