नेपाल इन्फ्रास्ट्रक्चर्स इन्भेष्टमेन्ट फन्डद्वारा १० मेगावाटको मिथिला सोलारमा लगानी

काठमाडौं। नेपालमा नवीकरणीय ऊर्जाको विस्तारलाई थप गति दिन नेपाल इन्फ्रास्ट्रक्चर्स इन्भेष्टमेन्ट फन्डले १० मेगावाट क्षमताको मिथिला सोलार परियोजनामा लगानी गर्ने सम्झौता गरेको छ।
फन्ड हिमालयन एभरेष्ट इन्स्योरेन्स, हिमालयन लाइफ इन्स्योरेन्स, नेपाल–रि इन्स्योरेन्स र प्रभु महालक्ष्मी लाइफ इन्स्योरेन्सको संयोजनमा स्थापित हो।

मधेश प्रदेशको जनकपुरमा अवस्थित यो अन–ग्रिड सोलार परियोजना ऊर्जा डेभलपर्सले विकास गरेको हो। ऊर्जा डेभलपर्सले सन् २०३० सम्म एक हजार मेगावाट (१ गिगावाट) कार्बन–न्यूट्रल ऊर्जा उत्पादन गर्ने लक्ष्य लिएको छ। जसले नेपालको दिगो ऊर्जा रणनीतिसँग पूर्ण रूपमा मेल खान्छ।

यो लगानीसँगै ग्लोबल इक्विटी फन्ड नेपालका सोलार परियोजनामा सबैभन्दा ठूला संस्थागत लगानीकर्तामध्ये एकको रूपमा स्थापित भएको फन्डले जानकारी दिएको छ।

यसअन्तर्गत पशुपति रिन्युएबल्स (२५ मेगावाट), जीआई सोलार (६.८ मेगावाट), सोलार फार्म (५ मेगावाट), लुम्बिनी (५० मेगावाट) र बुद्धभूमि (४० मेगावाट) लगायतका सोलार परियोजनामा पनि लगानी तथा प्रतिबद्धता जनाएको छ।

अफ–ग्रिड कम्पनी घाम पावरमा पनि यसले सेयर लगानी गरेको छ।

नेपाल इन्फ्रास्ट्रक्चर्स इन्भेष्टमेन्ट फन्डका अध्यक्ष डा. मनिष थापाले मिथिला परियोजनामा गरिएको लगानीले नेपालको दिगो पूर्वाधार निर्माणलाई बलियो बनाउने बताए। उनका अनुसार जलविद्युतमा देखिने मौसमी उतार–चढावलाई सौर्य ऊर्जाले पूरक भूमिका खेल्ने भएकाले सोलार परियोजना ऊर्जा आपूर्ति सन्तुलनका लागि महत्वपूर्ण छ।

त्यसैगरी, ऊर्जा डेभलपर्सका प्रबन्ध निर्देशक भानु पोखरेलले ग्लोबल इक्विटी फन्डसँगको दीर्घकालीन सहकार्यले परियोजनाको सफलतामा महत्वपूर्ण भूमिका खेलेको बताए। उनले यो साझेदारी आफूहरूको चौथो सहकार्य भएको उल्लेख गर्दै, मिथिला सोलारमार्फत सौर्य ऊर्जा क्षेत्रमा प्रवेशले ऊर्जा स्रोतको विविधीकरणमा सहयोग पुग्ने बताए। उनका अनुसार यो परियोजना १ गिगावाट ऊर्जा उत्पादन लक्ष्यतर्फको महत्वपूर्ण कदम हो।