माथिल्लो म्याग्दी–१ जलविद्युत् आयोजनाको ३१ प्रतिशत काम सकियो, डेढ वर्षमा बिजुली उत्पादन होला?

म्याग्दी। धवलागिरी र मालिका गाउँपालिकामा निर्माणाधिन ५३.५ मेगावाट क्षमताको माथिल्लो म्याग्दी–१ जलविद्युत् आयोजनाको ३१ प्रतिशत भौतिक प्रगति भएको छ। आयोजनाको अझै ६९ प्रतिशत काम बाँकी छ।

अपर म्याग्दी हाइड्रोपावर लिमिटेड प्रर्वद्धक रहेको आयोजनाको बाँध, सुरुङ र विद्युतगृह निर्माणले गति लिएको छ। आयोजना प्रमुख ज्योतिकुमार केसीले एक वर्षको अवधीमा ३०.९४ प्रतिशत भौतिक र ३०.८० प्रतिशत वित्तीय प्रगति भएको जानकारी दिए।

“चार ठाउँबाट सुरुङ खन्ने काम भैरहेको छ,” उनले भने, “विस २०८३ फागुन भित्र विद्युत् उत्पादन शुरु गर्ने लक्ष्यअनुसार विद्युतगृह र बाँध निर्माण कार्यलाई पनि तिव्रता दिएका छौँ।” कुल पाँच हजार ७८९.७१ मिटर लामो सुरुङ हालसम्म दुई हजार तीन सय ६० मिटर निर्माण सकिएको छ।

विसं जेठ ८ गते सुरु भएको बाँध निर्माणस्थलमा ४५ प्रतिशत भौतिक प्रगति हासिल भएको छ। करिब दुई हप्तामा विद्युतगृहको उत्खनन् कार्य सकेर संरचना निर्माणको तयारी भएको छ। विसं २०८० चैत १९ मा सम्झौता गरेको सिभिल ठेकेदार लुना विल्डर्स एण्ड कन्ट्र्याक्टरले २०८१ जेठ ८ गते परिचालित भएको थियो।

धवलागिरी गाउँपालिका–४ खाम्लामा म्याग्दी नदीको पानीलाई सुरुङमा छिराउनका लागि १५ मिटर अग्लो र ४० मिटर लामो बाँध निर्माण भएरहेको छ। बाँध निर्माण स्थल नजिकै एक सय मिटर लामो र १५ मिटर अग्लो तीन वटा पानी थिग्राउने पोखरी निर्माणाधिन छ।

मेकानिकल र इलेक्ट्रो–मेकानिकल कार्यको लागि निर्माण कम्पनी छनौट भएको छ। नदी प्रवाही (रन अफ द रिभर) प्रकृतिको आयोजनाको आउटलेटबाट विद्युतगृहको उँचाइ १९६ मिटर छ। आउटलेटबाट पानीलाई विद्युतगृहमा खसाल्न ६९२ मिटर पेनस्टक पाइप जडान गरिनेछ।

ऊर्जा इन्जिनियरीङ एण्ड म्यानेजमेन्ट सोलुुसनले परामर्शदाता रहेको यस आयोजनाको प्रर्वद्धक कम्पनी ऊर्जा डेभलपर्स प्रालिमा आवद्ध छ। विद्युतगृहबाट मालिका गाउँपालिका–७ डाडाखेतमा निर्माणाधिन १३२ केभी क्षमताको सबस्टेशन जोड्ने १३२ केभी क्षमताको १.५ किलोमिटर प्रशारण लाइनको अध्ययन भइरहेको छ।

सानीमा बैंकको नेतृत्वमा छ वटा बैंकहरुले ऋण लगानी भएको छ। बैंक, प्रर्वद्धक कम्पनी र सर्वसाधारणको सेयर(आईपीओ) मार्फत जुटाइने ११ अर्ब २३ करोड २७ लाख रुपैयाँमा लगानीमा निर्माण भइरहेको छ।
आयोजनाको विद्युतगृह मालिका गाउँपालिका–७ भारवाङमा रहनेछ। यस आयोजनाबाट वार्षिक औसत ३१ करोड ५० लाख युनिट विद्युत् केन्द्रिय लाइनमा जोडिनेछ।

भारवाङबाट बाँध निर्माण स्थलसम्म नौ किलोमिटर पहुँचमार्ग निर्माण गरिसकेको आयोजनाले सामाजिक उत्तरदायित्वका कार्यक्रमका लागि छ करोड २० लाख रुपैयाँ बजेट बिनियोजन गरेको छ। हालसम्मको प्रगतिअनुसार निर्धारित समय तालिका भित्रै सम्पन्न हुनेमा विश्वस्त रहेको आयोजना प्रमुख केसीले बताए।