सालपा विकास बैंकको आईपीओ बिक्री खुला, कसले दिन पाउँछन् आवेदन ?

काठमाडौँः सालपा विकास बैंक लिमिटेडले आजदेखि पहिलो चरणमा वैदेशिक रोजगारमा रहेका नेपालीहरूका लागि आईपीओ निष्कासन तथा बिक्री खुला गरेको छ। बैंकले जारी पूँजी ५२ करोड २३ लाख ८८ हजार रुपैयाँको ३३ प्रतिशत बराबर १७ करोड २३ लाख ८८ हजार रुपैयाँ, अर्थात् १७ लाख २३ हजार ८८० कित्ता शेयर निष्कासन गर्ने अनुमति पाएको थियो।

त्यसमध्ये १० प्रतिशत, अर्थात् १ करोड ७२ लाख ३८ हजार ८०० रुपैयाँ बराबरको १ लाख ७२ हजार ३८८ कित्ता शेयर नेपाल सरकारको सम्बन्धित निकायबाट श्रम स्वीकृति प्राप्त गरी विदेशमा रोजगारी गरिरहेका नेपालीहरूका लागि छुट्याइएको हो।

आईपीओमा मंसिर २९ गतेसम्म आवेदन दिन सकिनेछ। सो अवधिभित्र पर्याप्त आवेदन नपरेमा निष्कासन अवधि पुस १० गतेसम्म थपिनेछ। वैदेशिक रोजगारमा रहेका नेपालीहरूले न्यूनतम १० कित्ता र अधिकतम २५ हजार कित्ता शेयरका लागि आवेदन दिन सक्नेछन्।

कम्पनीको आईपीओ निष्कासन तथा बिक्री प्रबन्धक मुक्तिनाथ क्यापिटल लिमिटेड रहेको छ। वैदेशिक रोजगारमा रहेका नेपालीहरूले नेपाल धितोपत्र बोर्डबाट अनुमति लिएका आस्बा सेवामा सहभागी बैंक तथा वित्तीय संस्थाबाट सि–आस्बा प्रणालीमार्फत आवेदन दिन सक्नेछन्। साथै, सिडिएस एण्ड क्लियरिङ लिमिटेडको ‘मेरो शेयर’ अनलाइनमार्फत पनि आवेदन दिन सकिनेछ।