इक्यान संस्था मात्र नभई मेरो लागि एउटा परिवार हो: लक्ष्मण पौडेल

काठमाडौँ: नेपाल शैक्षिक परामर्श संघ (ईक्यान) को आगामी निर्वाचन २०८२ को लागि अध्यक्ष पदमा उम्मेद्वारी दिएका लक्ष्मण पौडेलले इक्यान संस्था मात्र नभई एउटा परिवार जस्तो भएको बताएका छन्। शनिबार ‘सक्षम नेतृत्व, सशक्त इक्यान’ भन्ने नारासहित आयोजित कार्यक्रममा बोल्दै पौडेलले यो क्षेत्रमा दुई दशकभन्दा बढी समय बिताएको बताए।

पौडेलले आफ्नो अनुभव साझा गर्दै साधारण सदस्यदेखि भाइस प्रिसिडेन्टसम्मको जिम्मेवारी सम्हाल्दा संस्थाको काम, चुनौती र सम्भावना नजिकबाट बुझ्ने अवसर पाएको बताए।

‘इक्यान मेरो लागि संस्था मात्रै होइन, यो परिवार हो। मैले यो क्षेत्रलाई मेरो जिवनको हिस्सा बनाएको दुई दशक भन्दा बढी भयो। आज म जे छु त्यसमा यो क्षेत्रको ठूलो भूमिका छ। इक्यानको ८ वटा शाखा, ७ सय भन्दा बढी सदस्यहरू रहेको यो संस्थामा मेरो यात्रा गाँसिएको छ। यो क्षेत्रमा मेरो आज २० वर्ष भयो, इक्यान सँगको यात्रा १० वर्षको भयो। यही संस्थाको जिम्मेवार पद भाइस प्रिसिडेन्टको रुपमा काम गरेको पनि २ वर्ष भएको छ,’ उनले भने, ‘तपाईंहरूको विश्वासले मलाई राम्रो मतका साथ भाइस प्रिसिडेन्ट बने, जहाँ गए त्यो क्षण सम्झिँदा आज खुसी लाग्छ। किनभने त्यो पद भन्दा ठूलो तपाईंहरूको भरोसा थियो। साधारण सदस्यदेखी फस्ट भाइस प्रिसिडेन्टसम्मको जिम्मेवारी सम्हाल्दा इक्यानको काम त्यसको चुनौति र सम्भावनालाई मैले अझै नजिकबाट बुझ्ने मौका पाएँ। बुझ्दै जाँदा एउटा कुरा प्रस्ट भयो, जसरी हत्केलाले सूर्यलाई छेक्न सकिँदैन त्यसैगरी हामीले पनि यो क्षेत्रमा समस्या छैन भन्न सकिँदैन।’

साथै, उनले अब संस्थाको उद्देश्य अव्यवस्थित क्षेत्रलाई व्यवस्थित, मर्यादीत र सम्मानित बनाउनु रहेको बताए। व्यवसाय सुरु गर्दा अनुमति, स्वीकृति र नविकरणका प्रक्रिया, सञ्चालन गर्दा उजुरी, गुनासो र निवेदनको व्यवस्थापनमा इक्यानको भूमिका आवश्यक हुने उनले उल्लेख गरे।

उनले भने, ‘अब हाम्रो लक्ष्य अव्यवस्थितलाई व्यवस्थित मात्र होइन, मर्यादीत र सम्मानित बनाउने हो। व्यवसाय सुरु गर्दा अनुमति स्वीकृति नविकरणका कुराहरू आउँछन् र सञ्चालन हुँदै गर्दा उजुरी, गुनासो र निवेदनका कुराहरू आउँछन्। समाधानका लागि अनुगमन र नियमका कुरा आउँछन्, त्यो सबै चरणमा इक्यानको भूमिका हुनुपर्छ भन्ने प्रश्नले आज अझ जिम्मेवार बनाएको छ।’