सेटलमेन्ट ग्यारेन्टी फन्ड कार्यान्वयनबारे धितोपत्र बोर्डमा सरोकारवालाबीच छलफल

काठमाडौँ: नेपालको धितोपत्र बजारमा प्रणालीगत जोखिम न्यूनीकरण गर्ने उद्देश्यसहित सेटलमेन्ट ग्यारेन्टी फन्ड कार्यान्वयनबारे सरोकारवाला निकायहरूबीच छलफल भएको छ। नेपाल धितोपत्र बोर्डको कार्यालयमा बुधबार सम्पन्न बैठकमा बोर्ड, नेपाल स्टक एक्सचेन्ज (नेप्से), सिडिएस एण्ड क्लियरिङ लिमिटेड (सीडीएससी) तथा स्टक ब्रोकर्स एशोसिएशन अफ नेपालका पदाधिकारी तथा प्रतिनिधिहरू सहभागी थिए।

बैठकमा सेटलमेन्ट ग्यारेन्टी फन्डको सञ्चालन संरचना, कोष व्यवस्थापन प्रक्रिया र कार्यान्वयनका लागि आवश्यक कार्ययोजना तथा समयसीमाबारे विस्तृत छलफल भएको बोर्डले जनाएको छ। सेटलमेन्ट प्रक्रिया थप सुरक्षित बनाउँदै लगानीकर्ताको विश्वास बढाउने उद्देश्यले जोखिम व्यवस्थापन, डिफल्ट व्यवस्थापन र सम्बन्धित निकाय तथा धितोपत्र व्यवसायीहरूको भूमिकाबारे सहभागीहरूले आ–आफ्ना धारणा राखेका थिए।

बोर्डका अनुसार बजारको स्थायित्व कायम राख्दै लगानीकर्ताको हित संरक्षण गर्न सेटलमेन्ट ग्यारेन्टी फन्डको प्रभावकारी कार्यान्वयन आवश्यक भएकाले यो बैठक आयोजना गरिएको हो। बैठकमा नेप्से र सीडीएससीले सेटलमेन्ट तथा क्लियरिङ प्रणालीसम्बन्धी तयारी प्रस्तुत गरेका थिए भने स्टक ब्रोकर्स एशोसिएशनले बजार सञ्चालनको व्यवहारिक अनुभवका आधारमा सुझावहरू राखेको थियो।

सेटलमेन्ट ग्यारेन्टी फन्डलाई सहज र प्रभावकारी रूपमा कार्यान्वयन गर्न आगामी दिनमा थप प्राविधिक छलफल गर्दै सबै निकायबीच समन्वयात्मक रूपमा अघि बढ्ने निष्कर्ष बैठकले निकालेको बोर्डले जानकारी दिएको छ