अटिजम सचेतनाको आवाज बनेकी कविता ढकाल ‘मिसेस भोग नेपाल सिजन ३’ मा

काठमाडौँ: कविता ढकालले मिसेस भोग नेपाल सिजन ३ मा प्रतियोगी नं. ५ का रूपमा प्रभावशाली उपस्थिति जनाइरहेकी छन्। कमलामाई नगरपालिका–१३, सिन्धुली स्थायी घर भई हाल काठमाडौंको टोखामा बसोबास गर्दै आएकी ढकाललाई यस प्रतियोगितामा बलियो प्रतिस्पर्धीका रूपमा लिइएको छ। उक्त प्रतियोगिता सगुन ज्वेलर्स द्वारा आयोजना हुँदै आएको हो।

प्रतियोगी ढकाल बहुआयामिक प्रतिभा, सामाजिक प्रतिबद्धता र आत्मविश्वासका कारण प्रतियोगिताका उल्लेखनीय प्रतिस्पर्धीमध्ये एकका रूपमा हेरिएकी छन्। प्रतियोगितामा सहभागी हुने क्रममा उनले उठाएको प्रमुख विषयवस्तु नेपालमा अटिजम भएका बालबालिकाको भविष्य सुरक्षित गर्न सरकारको ग्यारेन्टी आवश्यक रहेको, सबै विद्यालयमा उनीहरूलाई अन्य बालबालिकासरह समान अवसर प्रदान गर्नुपर्ने तथा समाजमा समान व्यवहार हुनुपर्ने भन्ने रहेको छ।

अटिजमसँग सम्बन्धित क्षेत्रमा सक्रिय सहभागिता जनाउँदै आएकी ढकाल यस प्रतियोगितामा आउनुअघि हाडिगाउँस्थित अभानी फाउन्डेशन मा प्रशासन प्रमुखका रूपमा कार्यरत थिइन्। अटिजम भएका बालबालिका र तिनका अभिभावकसँग नजिकबाट काम गर्दै आएकी उनले संस्थामा व्यवस्थापन, अनुगमन तथा अभिभावक परामर्श (प्यारेन्ट्स काउन्सिलिङ) मा महत्वपूर्ण भूमिका निर्वाह गरेकी छन्।

मिसेस भोग नेपाल सिजन ३ को तयारीका कारण उनले केही समयका लागि नियमित कार्यबाट विश्राम लिएकी भए पनि सामाजिक सेवाप्रतिको उनको प्रतिबद्धता यथावत् रहेको बताउँछिन्। एप्लाइड व्यवहार विश्लेषण (एबीएटी) कोर्सको परीक्षा उत्तीर्ण गरेकी उनले व्यवहार विश्लेषणमार्फत अटिजम भएका बालबालिकाको जीवनमा सकारात्मक परिवर्तन ल्याउने लक्ष्य स्पष्ट देखिन्छ।

व्यक्तिगत विकासका विविध आयाममा पनि कविता ढकाल उत्तिकै सक्रिय छिन्। होटल व्यवस्थापन तालिम, मेकअप आर्टिस्टको औपचारिक कोर्स तथा योग तालिम प्राप्त गरेकी उनले सिप विकासलाई आत्मनिर्भरता र सशक्तीकरणसँग जोड्ने दृष्टिकोण प्रस्तुत गरेकी छिन्।

उनी दैनिक रूपमा योग, जुम्बा तथा जिममा सक्रिय रहँदै शारीरिक र मानसिक सन्तुलनलाई प्राथमिकतामा राख्दै आएकी छन्।

‘पारिवारिक दायित्व, पेशागत व्यस्तता र सामाजिक सेवाबीच सन्तुलन कायम गर्दै देखाएको आत्मविश्वास धेरै महिलाका लागि प्रेरणाको स्रोत बन्न सक्छ। मिसेस भोग नेपालको यो यात्राले स्पष्ट सन्देश दिन्छ कि सशक्तीकरण केवल शब्द होइन, निरन्तर प्रयास, सिकाइ र सामाजिक जिम्मेवारीको अभ्यास हो,’ उनले भनिन्। ‘सौन्दर्यसँगै संवेदनशीलता, प्रतिभासँगै प्रतिबद्धता र आत्मविश्वाससँगै सेवा भाव जोडिन सके मात्र वास्तविक परिवर्तन सम्भव हुन्छ।’

यस प्रतियोगिताको फाइनल कार्यक्रम फागुन १२ गते ललितपुरस्थित म्याजेस्टिक ग्राण्डमा हुने भएको छ। दर्शक तथा शुभेच्छुकहरूले इसेवा एपको भोटिङ एन्ड इभेन्ट्स मेनुमा गई प्रतियोगी नं. ५ छनोट गरेर वा मोबाइल बैंकिङ एपमार्फत क्यूआर कोड स्क्यान गरी भोट गर्न सक्ने आयोजकले जनाएको छ।