छ महिनामा थपियो ३८९ मेगावाट बिजुली

काठमाडौं। चालू आर्थिक वर्षको दोस्रो त्रैमाशमा केन्द्रीय प्रणालीमा ३८९ मेगावाट बिजुली थप भएको छ। निर्माणाधीन विभिन्न परियोजना सम्पन्न भई उक्त परिमाण बिजुली थप भएको हो।

चालू आर्थिक वर्ष सरकारले नौ सय मेगावाट बिजुली थप गरी ४५ सय मेगावाट पुर्याउने लक्ष्य लिएको छ। छ महिनाको प्रगति हेर्दा उक्त लक्ष्य पुरा हुने देखिन्दैन्।

नेपाल विद्युत प्राधिकरणका अनुसार हालसम्म राष्ट्रिय प्रसारण लाइनमा जडित क्षमता बढेर चार हजार मेगावाट पुगेको छ।

सरकारले आगामी एक दशकमा १५ हजार मेगावाट बिजुली निर्यात गर्ने लक्ष्य लिएको छ। जसअनुसार १० हजार मेगावाट भारत र पाँच हजार मेगावाट बंगलादेशमा निर्यात गर्ने लक्ष्य लिएको छ।

यसैगरी नागढुङ्गा–नौबिसे सुरुङ मार्ग चालू आर्थिक वर्षभित्रै सञ्चालनमा ल्याउने गरी तयारी कार्य अघि बढेको छ। टोल रोडका लागि बोलपत्र आब्हान भएको छ।

ठूला र रणनीतिक राजमार्गहरूको निर्माण गति लिन थालेको छ। त्यसैगरी, सेवा क्षेत्र क्रमशः सुधार हुँदै गएको नेपाल राष्ट्र बैंकले जनाएको छ।

चालू आर्थिक वर्ष मौसम प्रतिकूलताको कारण धानको उत्पादन ४.२ प्रतिशत घट्ने अनुमान रहे पनि अन्य उपजहरूको उत्पादन बढेकाले कृषि क्षेत्रको उत्पादन समग्रमा सकारात्मक रहने अनुमान गरिएको छ।

त्यसैगरी, सेवा क्षेत्र क्रमशः सुधार हुँदै गएको देखिएको । विदेशी पर्यटक आगमन संख्या सन् २०२५ मा ११ लाख ५८ हजार पुगेको छ। आयात र निर्यात व्यापारमा वृद्धि भएको छ।

यस अवधिमा विप्रेषण आप्रवाह उल्लेख्य बढेकोले त्यस्ता घरपरिवारको खर्च र लगानीयोग्य आय बढ्नुका साथै आन्तरिक पर्यटन विस्तारमासमेत योगदान पुगेको अनुमान राष्ट्र बैंकको छ।

उपभोक्ता मुद्रास्फीति न्यून रहेको छ। विश्व बजारमा कच्चा पेट्रोलियम पदार्थ र खाद्यान्नको मूल्य घट्दै गएको तथा छिमेकी मुलुकहरूमा समेत मुद्रास्फीति न्यून रहेकोले चालू आर्थिक वर्ष औसत उपभोक्ता मुद्रास्फीति लक्षित सीमाभन्दा केही कम हुने प्रक्षेपण छ।

यद्यपि, कतिपय मुलुकहरू बीचको भूराजनीतिक तनाव र व्यापार महसुलमा भएको उतार–चढावले मूल्यमा चाप पर्ने जोखिम कायमै देखिएको छ।

पहिलो त्रैमाशमा आर्थिक वृद्धि साढे तीन प्रतिशत हुने अनुमान राष्ट्रिय तथ्यांक कार्यालयले जनाएको छ।