पोखरामा वाडा अटो शो सुरु: कुन कुन ब्राण्डका सवारीसाधन राखिएका छन्?

पोखरा: पश्चिमाञ्चल अटोमोबाइल डिलर्स एशोशिएसन (वाडा) र नाडा अटोमोबाइल्स एशोसिएशन अफ नेपालद्वारा आयोजना गरिएको दोस्रो नाडा प्रेजेन्ट्स् वाडा अटो शो २०२६ आजदेखि पोखराको लेकसाइड, तालबराही चोक स्थित खेल मैदानमा सुरु भएको छ।

प्रदेशकै सबैभन्दा ठूलो अटो प्रदर्शनीको रूपमा तयार भएको यस प्रदर्शनीमा १६ वटा ब्राण्डका ४–पाङ्ग्रे, ६ वटा ब्राण्डका लाइट कमर्शियल, १० वटा ब्राण्डका २–पाङ्ग्रे, एउटा हेभी कमर्शियलसहित लुब्रिकेन्ट, टायर, ग्यारेज उपकरण र वित्तिय संस्थाका २० स्टलहरू सहभागी छन्।

चार पाङ्ग्रेमा टाटा, ओमोडा एण्ड जेको, लिपमोटर, किया, डिपल, नामी, बीवाइडी, एमजी, हुन्डाई, फोर्थिङ, प्रोटोन, सुजुकी, स्काईवर्थ, अउकवेल, कायी र निसान तथा दुई पाङ्ग्रेमा एथर, एम्पियर, टीभीएस, यामाहा, जोन्टिस जस्ता ब्रान्ड राखिएका छन्। यी सबै ब्रान्डका बिक्रेताले नगद छुटसहित विभिन्न अफर पनि सार्वजनिक गरेका छन्।

यस संस्करणमा विशेष भिन्टेज कार शो आयोजना गरिएको छ, जहाँ ऐतिहासिक पुराना मोडलका कारहरूको जानकारी अवलोकनकर्ताहरूले प्रत्यक्ष हेर्न सक्नेछन्। साथै, अत्याधुनिक प्रविधि र नवपरिवर्तन प्रस्तुत गर्न युनीट्रि जि वान ह्युमानोइड रोबोट, युनीट्रि गो टु, चंखे जस्ता रोबोटहरूको प्रदर्शन राखिएको छ।

आयोजकले जानकारी दिए अनुसार, ५ दिनसम्म चल्ने प्रदर्शनीमा करिब ४५ हजारले अवलोकन गर्ने अपेक्षा गरिएको छ। प्रदर्शनी टिकटमा विशेष आकर्षण स्वरूप खल्ती एपमार्फत टिकट खरिद गर्दा क्यास ब्याक सुविधा पनि उपलब्ध छ। प्रत्येक दिन पहिलो १०० जना साधारण टिकटमा ५०% र पहिलो १०० जना विद्यार्थी टिकटमा १००% फिर्ता।

पोखरा महानगरपालिकाको प्रबर्द्धन तथा ग्लोबल एक्सपोजिसन एण्ड म्यानेजमेन्ट सर्भिसेज (जेम्स)को व्यवस्थापनमा संचालन भइरहेको यस प्रदर्शनीले अटो व्यवसायको प्रबर्द्धन, आधुनिक प्रविधि अवलोकन, र आन्तरिक पर्यटन प्रवद्र्धनमा महत्वपूर्ण भूमिका खेल्ने विश्वास आयोजकको छ।