बुकबिल्डिङबाट आईपीओ ल्याउदै नर्भिक हस्पिटल, संस्थागत लगानीकर्तासँग थाल्यो छलफल

काठमाडौं। बीएलसी ग्लोबल होल्डिङले सञ्चालन गरिरहेको नर्भिक इन्टरनेसनल हस्पिटल एन्ड मेडिकल कलेज लिमिटेडले बुकबिल्डिङ विधिबाट साधारण सेयर (आईपीओ) ल्याउने भएको छ। हस्पिटलले बुकबिल्डिङबाट आईपीओ जारी गर्न प्रक्रिया अघि बढाएको छ।

नर्भिकले बुकविल्डिङ निर्देशिकाअनुसार प्रारम्भिक विवरणपत्रमा योग्य संस्थागत लगानीकर्ताहरुलाई सहभागी गराउने भएको छ।

सोही निर्देशिकाको व्यवस्थाअनुरूप आशय मूल्य योग्य संस्थागत लगानीकर्ताले खरिद गर्न चाहेको न्यूनतम सेयर संख्या, आशय मूल्य तथा मूल्यांकनको आधारसहित प्रारम्भिक विवरणपत्रमा सुझाव लिन लागेको छ।

नेपाल धितोपत्र बोर्डबाट योग्य संस्थागत लगानीकर्ताको रुपमा कार्य गर्न स्वीकृति प्राप्त संस्थाहरुलाई सहभागी हुन नर्भिकले भनेको छ। यही वैशाख ११ गते शुक्रबार छलफलका लागि बोलाएको छ।

आईपीओ निष्कासन गर्न सन् २०२१ मा नर्भिक पब्लिक लिमिटेडमा रुपान्तरण भएको हो। नर्भिक इन्टरनेशनलले २५ लाख कित्ता आईपीओ जारी गर्ने भएको छ।

नर्भिकले धितोपत्र निष्कासन तथा बिक्री प्रवन्धकमा एलएस क्यापिटल लिमिटेडलाई नियुक्त गरेको छ।

पछिल्लो समय मुलुकमा अर्बौं रुपैयाँ लगानीमा ‘मल्टिस्पेसियालिटी’ अस्पताल सञ्चालनमा आउन थालेका छन्। एक दर्जन यस्ता अस्पतालहरु पाइपलाइनमा छन्।सञ्चालनमा रहेका अस्पतालहरुले पनि क्षमता बढाएर मल्टिस्पेसियालिटीमा परिणत गर्न थालेका छन्।

यस्तै तीन दशक बढी पुरानो नर्भिक इन्टरनेसनले हस्पिटले पनि क्षमता बढाउन लागेको छ।

नर्भिक इन्टरनेसनलले दुई अर्ब ३७ करोड ५० लाख रुपैयाँ लगानी थपेर सेवा विस्तार थालेको हो। २०२३ देखि सेवा विस्तार गर्न नयाँ भवन निर्माण गरिरहेको छ। आउँदो पुससम्म नयाँ भवनबाट स्वास्थ्य सेवा दिने योजना नर्भिकको छ।

हस्पिटलको क्षमता बढाउन नर्भिकले एक अर्ब ८६ करोड रुपैयाँ ऋण लिएको छ।

नयाँ पूर्वाधार बनेपछि नर्भिकले अस्पतालको क्षमता बढाएर २७५ बेड पुर्याउने भएको छ। नर्भिकले ओपिडी र आइपिडीका लागि क्षमता विस्तार थालेको हो। अहिले ११६ बेड क्षमता छ। विस्तारपछि २७५ बेड पुग्नेछ।

नर्भिकले अहिलेको पार्किङ स्थल क्षेत्रमा अत्याधुनिक सेवा र सुविधासम्पन्न आठ तले भवन निर्माण गरिरहेको छ।

अस्पतालले भवन रोशन कन्स्ट्रक्सनले बनाइरहेको छ। नयाँ भवन ‘कम्प्रिहेन्सिभ क्यान्सर ट्रिटमेन्ट’ सहितको आधुनिक र सुविधासम्पन्न हुनेछ। कूल एक लाख ६५ हजार वर्गफिटमा आधुनिक भवन बन्ने छ।

साढे दुई अर्ब लगानीमा क्षमता बढाउँदै नर्भिक हस्पिटल, आईपीओ जारी गर्ने

नर्भिकले सेयरधनीलाई आकर्षक लाभांश दिँदै आएको छ। नर्भिकले सेयरधनीलाई ४२ प्रतिशतसम्म लाभांश दिएको थियो।

नर्भिकको बलियो ब्रान्ड छवि छ। अस्पतालले स्वदेशी र अन्तर्राष्ट्रिय बिरामीहरूलाई स्वास्थ्य सेवा प्रदान गर्ने नर्भिक पहिलो अस्पताल हो।

पहिलो त्रैमाशमा एक अर्ब ३३ करोड ८० लाख रुपैयाँबराबरको व्यापार गरेको छ। नर्भिकले गत वर्ष सन् २०२५ मा दुई अर्ब २२ करोड २० लाख रुपैयाँ कारोबार गरेको थियो।

२०२४ मा एक अर्ब ९९ करोड, २०२३ मा एक अर्ब ९१ करोड र २०२२ मा एक अर्ब ७८ करोड ५० लाख रुपैयाँ कारोबार गरेको थियो। नर्भिकको कारोबार बढ्दै गएको छ।

सन् १९९३ मा उद्योगपति वसन्तकुमार चौधरीले ३० बेडसहितको नर्भिक हेल्थकेयर एन्ड रिसर्च सेन्टरबाट स्वास्थ्य सेवा सुरु गरेका थिए।

मेडिकेयर हस्पिटल लिमिटेड र हस्पिटल फर एडभान्स मेडिसिन एन्ड सर्जरी (ह्याम्स) लिमिटेडले अंकित मूल्यमा आईपीओ निष्कासन गर्न धितोपत्र बोर्डमा आवेदन दिएका छन्।