बैंकको ऋण नतिरेपछि लिलामीमा चढ्यो पोखराको चारतारे हेरिटेज होटल

काठमाडौँ: दुई वाणिज्य बैंकबाट लिएको ऋण तिर्न नसकेपछि आठ वर्षअघि पोखरामा खुलेको चारतारे हेरिटेज होटल एन्ड स्वीट्स प्रालि लिलामीमा जाने भएको छ। नेपाल इन्भेस्टमेन्ट मेगा बैंक र हिमालयन बैंकले धितो राखेको सम्पत्ति बिक्री गर्न लागेको हो। इन्भेस्टमेन्ट र हिमालयन बैंकले सहवित्तीयकरणबाट हेरिटेज होटलमा ऋण लगानी गरेका थिए।

पर्यटन व्यवसायी रविचन्द्र हमालले एक अर्ब रुपैयाँ लगानीमा उक्त होटल बनाएका हुन्। होटल २०७५ असोज ३० देखि औपचारिक रुपमा सञ्चालनमा आएको हो।

कर्जा सम्झौताबमोजिम तिर्न बुझाउन पटक पटक मौखिक तथा लिखित ताकेता र सार्वजनिक सूचना प्रकाशित गर्दासमेत ऋणी हेरिटेज होटल तथा जमानीकताहरुले पूर्ण वेवास्ता गरि कर्जा चुत्ता गर्नेतर्फ पहल नगरेको दाबी बैंकको छ।

सात दिनभित्र साँवा, ब्याज र उक्त रकममा लाग्ने हर्जनालगायतका अन्य दस्तुरसमेत तिर्न बैंकले ‘अल्टिमेटम’ दिएको छ। यस्तै कर्जा सूचना केन्द्रको कालोसूचीमा राख्ने चेतावनी बैंकले गराएको छ। सात दिनभित्र ऋण नतिरे लिलामीको प्रक्रिया सुरु गर्ने बैंकले जानकारी गराएको छ।

ऋण असूल गर्न होटलले कर्जाको सुरक्षणको रुपमा धितोबन्धक लेखिदिएका मकवानपुर शिखरकोट र पोखरामा रहेको चल अचल सम्पत्ति बिक्रीका लागि प्रस्ताव मागेको छ।

सम्पत्ति लिलाम बिक्री नभए अन्य व्यवस्था गरी बेचविखन गर्नसक्ने वा प्रचलित कानून बमोजिम बैकले सकार गरी लिनसक्ने र उक्त सम्पत्तिबाट बैंकको सम्पूर्ण बक्यौता रकम असूल नभएमा प्रचलित कानून बमोजिम असुल उपर गर्न आवश्यक कारवाही अघि बढाइने बैंकले जानकारी दिएको छ।

काठमाडौंमा ट्राभल एजेन्सी र होटल सञ्चालन गर्दै आएका व्यवसायी हमालले लेकसाइडमा हेरिटेज होटल सञ्चालनमा ल्याएका हुन्।

पाँच रोपनी क्षेत्रफलमा फैलिएको होटलमा तीनवटा भवन छन्। तीनवटै भवन विशुद्ध नेपाली कलाले भरिपूण रहेको छ। होटल बनाउन भक्तपुरबाट कलात्मक इँटाहरु ल्याइएको थियो। यस्तै झ्यालहरु ऐतिहासिक रुपमा महत्व राख्ने खालका छन्। होटलको मूल ढोकादेखि झ्याल, ढोका, सिंडी, बार्दलीमा नेपाली कलाकृति कुँदिएको छ।

होटल निर्माण गर्न आठ वर्ष लागेको थियो। मौलिक नेपाली सामानको प्रयोग र कलात्मक बनाउँदा समय लागेको होटलको ‘लञ्च’ कार्यक्रममा हमालले जानकारी दिएका थिए। पुरानो कला, कौशलको प्रयोग गरी नेपाली संस्कृति झल्काउन आफूले समय र पैसा लगानी गरिएको छ। त्यसबेला उनले होटलमा १०० डलरदेखि १५० डलरसम्मका कोठाहरु उपलब्ध रहेको जानकारी गराएका थिए।

होटलमा कुल ६८ कोठा छन्। अन्नपूर्ण हिमालको नामबाट राखिएको पहिलो ब्लक ५ तलाको छ। भुईंतलामा लबी र कोठाहरु छन भने अन्य तलामा सबै कोठाहरु छन्।

लाङटाङ हिमालको नाममा रहेको लाङटाङ ब्लक बीचमा छ। यसमा पनि भुईंतलामा ज्याकोजी लगायतका सेवाहरु छन्। सबैभन्दा पुछारको ब्लक सगरमाथाको नाममा एभरेष्ट ब्लक भनेर राखिएको छ। यसमा हेल्थ क्लब, स्टिम, साउना, ज्याकुजी, स्पाः थेरापी, पुलवार, रेष्टुरेण्ट, बारलगायत छन्।

होटलमा पाँच सय क्षमताको दुई वटा सभाहलका साथै पर्याप्त पार्किङ स्पेस छ भने तीन वटै भवनको बिचमा स्विमिङ पुल छ। होटलमा स्विट रुम १८ वटा छन् भने सबै डिलक्स रुम छन्।