मौद्रिक नीति निर्माणको तयारीमा राष्ट्र बैंक, असार ५ भित्र सुझाव दिन आग्रह

काठमाडौँः आगामी आर्थिक वर्ष २०८३/८४ को मौद्रिक नीति निर्माणको तयारीमा नेपाल राष्ट्र बैंक जुटेको छ। केन्द्रीय बैंकले मौद्रिक नीतिलाई थप प्रभावकारी, व्यावहारिक र अर्थतन्त्रको आवश्यकताअनुकूल बनाउन विभिन्न सरोकारवाला पक्षसँग राय तथा सुझाव माग गरेको छ।

राष्ट्र बैंकको आर्थिक अनुसन्धान विभागले सूचना जारी गर्दै बैंक तथा वित्तीय क्षेत्र, निजी क्षेत्र, अर्थविद्, व्यवसायी, पेशाकर्मी तथा सर्वसाधारणलाई मौद्रिक नीतिसम्बन्धी सुझाव उपलब्ध गराउन आग्रह गरेको हो।

नेपाल राष्ट्र बैंक ऐन, २०५८ अनुसार प्रत्येक वर्ष आगामी आर्थिक वर्षका लागि मौद्रिक नीति तर्जुमा गरिने व्यवस्था छ। सोही व्यवस्थाअनुरूप आगामी वर्षको नीति निर्माण प्रक्रिया अघि बढाइएको राष्ट्र बैंकले जनाएको छ।

इच्छुक व्यक्ति तथा संस्थाले आफ्ना सुझावहरू असार ५ गतेभित्र राष्ट्र बैंकमा पठाइसक्नुपर्नेछ।

सरकारले हालै सार्वजनिक गरेको आगामी आर्थिक वर्षको बजेटमा उल्लेख गरिएका आर्थिक तथा वित्तीय लक्ष्यहरूलाई सहयोग पुग्ने गरी राष्ट्र बैंकले प्रत्येक वर्ष साउन महिनाको पहिलो वा दोस्रो साताभित्र मौद्रिक नीति सार्वजनिक गर्ने गरेको छ।

यस वर्ष पनि निर्धारित समयमै मौद्रिक नीति ल्याउने तयारीस्वरूप राष्ट्र बैंकले सुझाव संकलन प्रक्रिया अगाडि बढाएको हो। प्राप्त सुझावहरूलाई अध्ययन गरी आवश्यक विषयहरू मौद्रिक नीतिमा समेटिने अपेक्षा गरिएको छ।