विदेशी मुद्रा सञ्चिती बढेर पुग्यो ३७ खर्ब चार अर्ब, १९ महिनालाई आयात धान्ने

काठमाडौं। विदेशी विनिमय सञ्चिती ३८.३ प्रतिशत बढेर ३७ खर्ब चार अर्ब ५५ करोड रुपैयाँ पुगेको छ। २०८२ असार मसान्तमा २६ खर्ब ७७ अर्ब ६८ करोड रुपैयाँ थियो।

अमेरिकी डलरमा यस्तो सञ्चिति २०८२ असार मसान्तमा १९ अर्ब ५० करोड रहेकोमा गत वैशाखमा २४ प्रतिशत वृद्धि भई २४ अर्ब १९ करोड पुगेको नेपाल राष्ट्र बैंकले जनाएको छ।

कुल विदेशी विनिमय सञ्चितिमध्ये राष्ट्र बैंकमा रहेको सञ्चिति २०८२ असार मसान्तमा २४ खर्ब १४ अर्ब ६४ करोड रहेकोमा गत वैशाखमा ३६.६ प्रतिशत वृद्धि भई ३२ खर्ब ९८ अर्ब ३८ करोड रुपैयाँ पुगेको छ।

बैंक तथा वित्तीय संस्था (नेपाल राष्ट्र बैंकबाहेक) सँग रहेको विदेशी विनिमय सञ्चिति २०८२ असार मसान्तमा दुई खर्ब ६३ अर्ब ४ करोड रहेकोमा २०८३ वैशाखमा ५४.४ प्रतिशत वद्धि भई चार खर्ब छ अर्ब १७ करोड रुपैयाँ कायम भएको छ। कूल विदेशी विनिमय सञ्चितिमा भारतीय मुद्राको अंश २०.६ प्रतिशत रहेको छ।

आर्थिक वर्ष २०८२/०८३ को १० महिनासम्मको आयातलाई आधार मान्दा बैंकिङ क्षेत्रसँग रहेको विदेशी विनिमय सञ्चिति २२.६ महिनाको वस्तु आयात र १९.२ महिनाको वस्तु तथा सेवा आयात धान्न पर्याप्त रहने राष्ट्र बैंकले जनाएको छ।

विदेशी विनिमय सञ्चितिको कुल गार्हस्थ्य उत्पादन, कुल आयात र विस्तृत मुद्राप्रदायसँगका अनुपातहरू क्रमशः ६०.७, १५९.७ र ४३.३ प्रतिशत रहेका छन्।