बुक बिल्डिङबाट आईपीओ ल्याउन टाइमले संस्थागत लगानीकर्तासँग छलफल गर्दै, मूल्य कति होला?

काठमाडौं। टाइम फर्मास्युटिकल्स लिमिटेडले बुक बिल्डिङ विधिबाट साधारण सेयर (आईपीओ) निष्कासन गर्न लागेको छ। टाइम फर्मास्युटिकल्सले चार लाख ३४ हजार ६०० कित्ता आईपीओ बुकबिल्डङ विधिबाट निष्कासन गर्न लागेको हो।

टाइम फर्मास्युटिकल्सले योग्य संस्थागत लगानीकर्तासँग यही असार १९ गते शुक्रबार छलफल (रोड शो) गर्ने भएको छ। छलफलमा संस्थागत लगानीकर्ताले खरिद गर्न चाहेको सेयर संख्या र आशय मूल्य प्रस्ताव हुने भएको छ। यस्तै धितोपत्र निष्कासन तथा बिक्री प्रवन्धकमा नबिल इन्भेष्टमेन्ट बैंकिङ लिमिटेड रहेको छ।

यसअघि गत चैतमा टाइम फर्मास्युटकल्स र नेपाल स्टक एक्सचेञ्ज लिमिटेड (नेप्से) बीच बुकबिल्डिङ विधिबाट आईपीओ ल्याउन सम्झौता भइसकेको छ। हालसम्म टाइमलगायत विभिन्न सात कम्पनीहरुले बुक बिल्डिङ प्रक्रियामार्फत आईपीओ निष्काशनका लागि नेप्सेसँग औपचारिक सम्झौता गरिसकेका छन्।

बुक बिल्डिङबाट आईपीओ ल्याउनेको संख्या बढ्दै, सात कम्पनी अघि बढाए प्रक्रिया

यसैबीच टाइम फर्मास्युटिकल्सले विशेष साधारणसभाबाट आईपीओ जारी गर्ने प्रस्ताव पारित गरिसकेको छ। कम्पनीले चुक्ता पूँजी ४२ करोड ९१ लाख रुपैयाँबाट बढाएर ४६ करोड रुपैयाँ पुर्याउने लक्ष्य राखेको छ।

उद्योगले कुल जारी पूँजीको २०.६५ प्रतिशत सेयर सर्वसाधारणमा निष्काशन गर्ने योजना बनाएको छ। सन् १९९४ मा स्थापना भई १९९७ देखि औषधी उत्पादन सुरु गरेको टाइम फर्मास्युटिकल्समा विभिन्न निजी लगानीकर्ताको उल्लेखनीय सहभागिता रहेको छ।

टाइममा अल्फा क्यापिटल लिमिटेडको १३ प्रतिशत स्वामित्व छ भने अन्य प्रमुख लगानीकर्तामा राजु कर्मचार्य, झनकान्त भट्ट र नारायणबहादुर क्षेत्री रहेका छन् टाइमको औषधी उत्पादन कारखाना नबलपुरको गैंडाकोटमा रहेको छ।

ओममेगा श्री फर्मास्युटिकल्स लिमिटेडपछि आईपीओ जारी गर्ने टाइम दोस्रो औषधी उद्योग हुने भएको छ।

९० करोडको औषधी व्यापार

टाइमको गत वर्ष सन् २०२५ मा औषधी व्यापार घटेर ९० करोड ४० लाख रुपैयाँमा सीमित भएको छ। २०२४ मा उद्योगले ९५ करोड ६० लाख रुपैयाँको औषधी व्यापार गरेको थियो।

२०२२ मा ९९ करोड र २०२१ मा ७९ करोड रुपैयाँबराबरको औषधी कारोबार गरेको थियो। गत वर्ष उद्योगको मार्जिन १७.८ प्रतिशत छ। उद्योगका मुलुकभर दुई सय बिक्री केन्द्रहरु रहेका छन्।