लाइसेन्सबिना सवारी चलाए १५ हजार, मापसे गरे ५० हजार जरिवाना!

काठमाडौँ: सरकारले ट्राफिक उल्लंघन लाग्ने जरिवाना उल्लेख्य रूपमा बढाउने प्रस्ताव गरेको छ। पूर्वाधार विकास मन्त्रालयले तयार पारेको ‘सवारी तथा यातायात व्यवस्था विधेयक’ को मस्यौदामा ट्राफिक नियम उल्लङ्घन गर्ने चालक तथा सवारीधनीलाई हालको भन्दा कडा दण्डको व्यवस्था गरिएको हो।

प्रस्तावित व्यवस्थाअनुसार लाइसेन्सबिनै सवारी चलाउनेलाई १५ हजार रुपैयाँ, सडकमा ट्राफिक संकेत हटाए वा बिगारेमा ५ हजार रुपैयाँ, मादक पदार्थ सेवन गरी मोटरसाइकल चलाउनेलाई २५ हजार रुपैयाँ तथा मादक पदार्थ सेवन गरी ठूला सवारी चलाउनेलाई ५० हजार रुपैयाँ जरिवाना लगाइनेछ।

यस्तै, ओभर स्पिडमा दुईपाङ्ग्रे सवारी चलाउनेलाई २५ हजार रुपैयाँ, मोटर–कार तथा ठूला सवारी ओभर स्पिडमा चलाउनेलाई ५० हजार रुपैयाँ, लेन अनुशासन पालना नगरी सवारी चलाउनेलाई १० हजार रुपैयाँ र सवारी चलाउँदा मोबाइल फोन प्रयोग गर्ने चालकलाई १० हजार रुपैयाँ जरिवाना प्रस्ताव गरिएको छ।

मस्यौदामा ट्राफिक संकेत पालना नगर्ने चालकलाई ५ हजार रुपैयाँ, निर्धारित क्षमताभन्दा बढी यात्रु बोक्नेलाई ५ सय रुपैयाँ, अव्यवस्थित ढंगले सवारी चलाउनेलाई ५ हजार रुपैयाँ तथा कागजात साथमा नराखी सवारी चलाउनेलाई १ हजार रुपैयाँ जरिवाना तोकिएको छ।

पूर्वाधार विकास मन्त्रालयले तयार पारेको मस्यौदा हाल सहमतिका लागि कानुन मन्त्रालयमा पठाएको छ। कानुन मन्त्रालयको सहमति प्राप्त भएपछि प्रस्ताव मन्त्रिपरिषद्‌मा जानेछ। मन्त्रिपरिषद्‌बाट स्वीकृत भएपछि विधेयक संघीय संसदमा दर्ता हुनेछ।

कुनै पनि विधेयक प्रतिनिधिसभा र राष्ट्रियसभाबाट पारित भई राष्ट्रपतिबाट प्रमाणीकरण भएपछि मात्र कानुन बन्छ। त्यसपछि नेपाल राजपत्रमा प्रकाशित भएपछि मात्रै उक्त व्यवस्था कार्यान्वयनमा आउनेछ।