भुटान भ्रमणअघि नै मौद्रिक नीति ल्याउने तयारीमा गभर्नर

काठमाडौं। नेपाल राष्ट्र बैंकले आगामी आर्थिक वर्षको मौद्रिक नीति मंगलबार सार्वजनिक गर्ने अन्तिम तयारी गरेको छ। परम्परागत रूपमा साउनको पहिलो वा दोस्रो सातामा आउने मौद्रिक नीति यस वर्ष पनि असारमै ल्याउने तयारी गरिएको हो।

यसअघि पनि गभर्नर प्राडा विश्वनाथ पौडेलको नेतृत्वमा गत वर्ष २७ असारमै मौद्रिक नीति सार्वजनिक गरिएको थियो। यसपालि पनि उनी भुटान भ्रमणमा निस्किनुअघि नै नीति सार्वजनिक गर्ने तयारीमा रहेको राष्ट्र बैंक स्रोतले जनाएको छ।

गभर्नर पौडेल असार २४ गते भुटानमा आयोजना हुने सार्क सदस्य राष्ट्रका केन्द्रीय बैंकका गभर्नरहरूको उच्चस्तरीय बैठकमा सहभागी हुन प्रस्थान गर्ने कार्यक्रम छ। उनको अनुपस्थितिमा कायममुकायम गभर्नरमार्फत मौद्रिक नीति सार्वजनिक गर्नु उपयुक्त नहुने निष्कर्षका आधारमा भ्रमणअघि नै नीति ल्याउने निर्णय भएको बताइएको छ।

पूर्वगभर्नर महाप्रसाद अधिकारीको कार्यकालमा भने मौद्रिक नीति क्रमशः आर्थिक वर्ष २०७९/०८० मा साउन ६ गते, २०८०/०८१ मा साउन ७ गते र २०८१/०८२ मा साउन ११ गते सार्वजनिक गरिएको थियो।

राष्ट्र बैंकले नयाँ आर्थिक वर्ष सुरु हुने साउन १ गतेदेखि नै मौद्रिक नीति कार्यान्वयनमा लैजाने लक्ष्य पनि राखेको छ। विगतमा नीति ढिलो आउँदा बैंक तथा वित्तीय संस्थाहरूले नयाँ आर्थिक वर्षका लागि व्यावसायिक योजना बनाउन समय लाग्ने गरेको थियो। यसपटक भने आर्थिक वर्षको सुरुदेखि नै बैंकिङ प्रणालीले नयाँ नीतिगत व्यवस्था, मौद्रिक औजार र ब्याजदर करिडोरअनुसार काम गर्न सक्ने अपेक्षा गरिएको छ।

अहिले बैंकिङ क्षेत्रमा पर्याप्त तरलता भए पनि कर्जा प्रवाह अपेक्षित रूपमा बढ्न सकेको छैन। बजारमा माग कमजोर छ भने निष्क्रिय कर्जा (एनपीएल) पनि बढ्दो क्रममा छ। सरकारले चालु आर्थिक वर्षका लागि राखेको सात प्रतिशत आर्थिक वृद्धिदरको लक्ष्य हासिल गर्न निजी क्षेत्रको मनोबल बढाउने र आर्थिक गतिविधिमा गति ल्याउने दबाब राष्ट्र बैंकमाथि रहेको छ। यही कारण नीति सार्वजनिक गर्न ढिलाइ नगरी समयमै बजारलाई स्पष्ट सन्देश दिन खोजिएको अधिकारीहरूको भनाइ छ।

हाल राष्ट्र बैंकको आर्थिक अनुसन्धान विभागले मौद्रिक नीतिको मस्यौदा तयार गरिसकेको छ। व्यवस्थापन समिति र सञ्चालक समितिको प्रक्रिया पूरा भएपछि बोर्डबाट स्वीकृति लिएर गभर्नर पौडेलले भुटान प्रस्थान गर्नुअघि नै मौद्रिक नीति सार्वजनिक गर्ने तयारी रहेको बताइएको छ।