साउनदेखि वाणिज्य बैंकहरूको निक्षेप ब्याजदर थप घट्यो, कुन बैंकको कति ?

काठमाडौँः वाणिज्य बैंकहरुको ब्याजदर निरन्तर ओरालो लाग्दै आएको छ। प्रणालीमा अधिक तरलता र कर्जाको मागमा आएको सुस्तताले गर्दा बैंकहरुले ब्याजदर घटाएका हुन्। निक्षेपको ब्याजदर निरन्तर घटेर न्यून विन्दुमा आइपुगेकाले पुँजी पलायनको जोखिम बढेको छ।

साउन १ गते (आज शुक्रबार) देखि लागू हुने गरि निक्षेपमा नयाँ ब्याजदर सार्वजनिक गरेका छन्। नयाँ दरअनुसार व्यक्तिगत मुद्दती निक्षेपमा औसत ब्याजदर ४.१७ प्रतिशतमा झरेको छ। यो दर असार महिनाको ४.२६ प्रतिशतको तुलनामा केही कम हो।

बैंकहरूले व्यक्तिगतसँगै संस्थागत मुद्दती निक्षेपको ब्याजदर पनि घटाएका छन्। संस्थागत मुद्दती निक्षेपतर्फ औसत ब्याजदर ३.१२ प्रतिशत कायम गरिएको छ।

यसपटक २० वाणिज्य बैंकमध्ये ६ बैंकले ब्याजदरमा घटाएका छन् भने बाँकी १४ बैंकले असार महिनाकै ब्याजदरलाई निरन्तरता दिएका छन्।

ब्याजदर घटाएका बैंकहरुमध्ये कुमारी बैंकले ३.८५, ग्लोबल आइएमई बैंकले ४, सिटिजन्स बैंकले ३.९५, एनएमबी बैंकले ४.५०, स्ट्याण्डर्ड चार्टर्ड बैंकले ३.८५ र राष्ट्रिय वाणिज्य बैंकले ४ प्रतिशत ब्याज दिनेछन्।

त्यस्तै, साउन महिनामा कृषि विकास बैंकले ४.१५, एभरेष्ट बैंकले ४.०५, नेपाल बैंकले ४.२५, नेपाल एसबीआई बैंकले ४.१०, लक्ष्मी सनराइज बैंकले ४, प्राइम कमर्सियल बैंकले ४, प्रभु बैंकले ४.५५, माछापुच्छ्रे बैंकले ४.५०, हिमालयन बैंकले ४, सिद्धार्थ बैंक ४.०५ प्रतिशत कायम गरेका छन्।
यस्तै नबिल बैंकले ४.५५, सानिमा बैंकले ४.५०, नेपाल इन्भेष्टमेन्ट मेगा बैंकले ४.५० र एनआईसी एशिया बैंकले ४ प्रतिशत ब्याज दिने भएका छन्।

नयाँ ब्याजदर लागू भएसँगै बैंकिङ प्रणालीमा निक्षेपको लागत थप घट्ने अपेक्षा गरिएको छ।