सेयर बजारबारे फैलाइएका भ्रामक हल्लामा विश्वास नगर्न अर्थमन्त्रीको सचिवालयको आग्रह

काठमाडौँ: अर्थमन्त्री डा. स्वर्णिम वाग्लेको सचिवालयले सेयर बजारसँग सम्बन्धित भ्रामक तथा प्रायोजित हल्लाबाट प्रभावित नहुन लगानीकर्तासँग आग्रह गरेको छ। नयाँ आर्थिक वर्ष २०८३/८४ को पहिलो दिन जारी अपिलमार्फत सचिवालयले नियामक निकायलाई प्रभावित पारेर बजारमा अस्थिरता सिर्जना गर्न खोज्ने गतिविधिमाथि निगरानी र अनुसन्धान भइरहेको जनाएको हो।

सचिवालयका अनुसार नयाँ सरकार गठनपछि सेयर बजारमा आएको उतारचढावलाई आधार बनाएर गलत भाष्य निर्माण गर्ने प्रयास भइरहेको छ। यस्ता गतिविधिले लगानीकर्तामा अनावश्यक त्रास सिर्जना गरी बजारलाई प्रभावित पार्ने उद्देश्य राखेको सचिवालयको दाबी छ।

विज्ञप्तिमा भारतका चर्चित सेयर कारोबारी हर्षद मेहताको उदाहरण उल्लेख गर्दै नेपालमा पनि त्यस्तै प्रकृतिका गतिविधि दोहोरिन नदिन सम्बन्धित निकायहरू सतर्क रहेको जनाइएको छ। साथै, नियामक संस्थामार्फत बजार सुधारका योजनाबद्ध पहल अघि बढाइएको पनि सचिवालयले जनाएको छ।

सचिवालयले बजारमा केही व्यक्तिलाई पक्राउ गर्न लागिएको वा अनुसन्धान भइरहेको भन्ने विषयमा फैलाइएका हल्ला निराधार र प्रायोजित रहेको स्पष्ट पारेको छ। सरकार परिणाममुखी ढंगले काम गरिरहेको अवस्थामा केही समूहले भ्रम फैलाएर व्यक्तिगत स्वार्थ पूरा गर्न खोजेको आरोप पनि विज्ञप्तिमा लगाइएको छ।

त्यस्तै, क्लबहाउस, ह्वाट्सएप, म्यासेन्जर समूह, स्वयंघोषित बजार विश्लेषक तथा अनधिकृत स्रोतबाट फैलाइने सूचनामा विश्वास नगर्न सचिवालयले लगानीकर्तालाई आग्रह गरेको छ। सेयर बजारसम्बन्धी जानकारीका लागि नेपाल धितोपत्र बोर्ड (सेबोन), नेपाल स्टक एक्सचेन्ज (नेप्से) लगायत आधिकारिक निकायबाट जारी सूचना मात्रै आधार बनाउन सुझाव दिइएको छ।

सचिवालयले नेपालको अर्थतन्त्रका प्रमुख सूचकहरू सकारात्मक दिशातर्फ अघि बढिरहेको पनि उल्लेख गरेको छ। बजारमा पर्याप्त तरलता, घट्दो ब्याजदर, स्थिर सरकार तथा नियामक निकायमा विज्ञ र सक्षम नेतृत्वको उपस्थितिलाई सकारात्मक संकेतका रूपमा व्याख्या गरिएको छ।

यसका साथै आयकरमा दिइएको छुट, लगानी र खर्च प्रवर्द्धन गर्ने सरकारी नीति तथा राजस्व विवादमा परेका करदातालाई पुनः अवसर दिने व्यवस्थाजस्ता कदमले अर्थतन्त्र सुधारमा योगदान पुग्ने विश्वास सचिवालयले व्यक्त गरेको छ।