माछापुच्छ्रे बैंकको सिनियर डीसीईओमा अर्याल र डीसीईओमा जमरकटेल

काठमाडौँ: माछापुच्छ्रे बैंकले उच्च व्यवस्थापन तहमा बढुवा गर्दै प्रसिद्ध राज अर्याललाई वरिष्ठ नायब प्रमुख कार्यकारी अधिकृत (सिनियर डेपुटी सीईओ) तथा सुभाष जमरकटेललाई नायब प्रमुख कार्यकारी अधिकृत (डेपुटी सीईओ) पदमा बढुवा गरेको छ।

बैंक सञ्चालक समितिको साउन ४ गते बसेको बैठकले अर्याललाई नायब प्रमुख कार्यकारी अधिकृतबाट वरिष्ठ नायब प्रमुख कार्यकारी अधिकृतमा तथा नायब महाप्रबन्धक जमरकटेललाई नायब प्रमुख कार्यकारी अधिकृतमा बढुवा गर्ने निर्णय गरेको हो।

काठमाडौं विश्वविद्यालयबाट व्यापार प्रशासनमा स्नातकोत्तर गरेका अर्यालसँग कर्जा, ट्रेजरी, करेस्पोन्डेन्ट बैंकिङ, शाखा सञ्चालन तथा लघुवित्तलगायत बैंकिङ क्षेत्रका विभिन्न विधामा करिब दुई दशकभन्दा बढी अनुभव रहेको बैंकले जनाएको छ। उनी यसअघि सिभिल बैंक, सनराइज बैंक र नेपाल इन्भेष्टमेन्ट बैंकमा समेत विभिन्न जिम्मेवारी सम्हालिसकेका अनुभवी बैंकर हुन्।

यस्तै, जमरकटेल वित्तीय तथा बैंकिङ क्षेत्रका विशेषज्ञ र अनुभवी चार्टर्ड एकाउन्टेन्ट हुन्। उनले इन्स्टिच्युट अफ चार्टर्ड एकाउन्टेन्ट्स अफ इन्डियाबाट चार्टर्ड एकाउन्टेन्सी, त्रिभुवन विश्वविद्यालयबाट व्यवस्थापन र कानूनमा स्नातक तथा थाइल्याण्डस्थित एसियन इन्स्टिच्युट अफ टेक्नोलोजी (एआईटी) बाट बैंकिङ तथा फाइनान्स विषयमा प्रोफेसनल मास्टर्स डिग्री हासिल गरेका छन्।

बैंकका अनुसार अर्याल र जमरकटेल दुवैले आफ्नो बैंकिङ करियरमा उल्लेखनीय व्यावसायिक उपलब्धि हासिल गर्दै सक्षम, अनुभवी तथा सफल बैंकरका रूपमा परिचित छन्।