सिद्धार्थ बैंकको नाफा बढेर साढे तीन अर्ब, वितरणयोग्य कति?

काठमाडौँ: सिद्धार्थ बैंकले गत आर्थिक वर्ष २०८२/०८३ को अपरिष्कृत चौथो त्रैमासिक वित्तीय विवरण सार्वजनिक गरेको छ। बैंकको वितरणयोग्य नाफा १ अर्ब ७० करोड ५६ लाख ७१ हजार रुपैयाँ पुगेको जनाएको छ।

नेपाल राष्ट्र बैंकको नियामकीय समायोजन तथा साविकको सञ्चित नाफा समायोजनपछि बैंकको प्रतिसेयर वितरणयोग्य नाफा ११ रुपैयाँ ५३ पैसा कायम भएको छ। बैंकका अनुसार क्यापिटल एड्जस्टमेन्ट रिजर्भसमेत समायोजन गर्दा वितरणयोग्य क्षमता प्रतिसेयर २६ रुपैयाँ १५ पैसा पुग्नेछ।

गत आर्थिक वर्षको चौथो त्रैमाससम्म बैंकले ३ अर्ब ५१ करोड ९४ लाख रुपैयाँ खुद नाफा आर्जन गरेको छ। जुन अघिल्लो आर्थिक वर्षको सोही अवधिको ३ अर्ब ३६ करोड ६५ लाख रुपैयाँको तुलनामा ४.५४ प्रतिशत बढी हो।

समीक्षा अवधिमा बैंकको खुद ब्याज आम्दानी ८ अर्ब ४३ करोड रुपैयाँबाट बढेर ९ अर्ब ५ करोड ११ लाख रुपैयाँ पुगेको छ। फि तथा कमिसन आम्दानी १ अर्ब ५८ करोड रुपैयाँबाट बढेर १ अर्ब ८६ करोड ४६ लाख रुपैयाँ पुगेको छ। यसबीचमा बैंकको सञ्चालन नाफा ५ अर्ब १६ करोड २७ लाख रुपैयाँ कायम भएको छ।

बैंकको कुल वासलात ३ खर्ब ८९ अर्ब ७३ करोड रुपैयाँ पुगेको छ। ग्राहक निक्षेप ३ खर्ब २७ अर्ब १ करोड रुपैयाँ र कर्जा लगानी २ खर्ब ३३ अर्ब ८७ करोड रुपैयाँ पुगेको छ।

हाल बैंकको साधारण चुक्ता पूँजी १४ अर्ब ७९ करोड ४४ लाख ७९ हजार रुपैयाँ रहेको छ। ३ अर्ब ५० करोड रुपैयाँको अविमोच्य असञ्चिति अग्राधिकार सेयरसहित कुल चुक्ता पूँजी १८ अर्ब २९ करोड ४४ लाख रुपैयाँ पुगेको छ। सञ्चित नाफा तथा अन्य जगेडा कोष गरी बैंकको कुल कोष १८ अर्ब ६२ करोड ५७ लाख रुपैयाँ रहेको छ।