सस्तो विद्युतीय गाडी खोज्दै हुनुहुन्छ? आजदेखि बिक्री सुरु भएका यी २ गाडी हुनसक्छन् विकल्प

काठमाडौँ: कम मूल्यमा राम्रो रेन्ज, पर्याप्त फिचर र एसयूभीको अनुभव खोजिरहेका ग्राहकका लागि नेपाली विद्युतीय सवारी बजारमा आजदेखि दुई नयाँ विकल्प थपिएका छन्। टाटा मोटर्सको अपडेटेड पन्च ईभी र लीपमोटरको नयाँ बी–०३ एक्स नेपाली बजारमा बिक्री सुरु भएको हो।

कम्प्याक्ट आकारमा रहेर पनि एसयूभीको स्वरूप, उच्च ग्राउण्ड क्लियरेन्स र आधुनिक प्रविधि उपलब्ध गराउने यी दुई गाडीले विशेषगरी बजेटमैत्री विद्युतीय एसयूभी खोज्ने ग्राहकलाई लक्षित गर्ने देखिन्छ। एकातर्फ नेपाली बजारमा पहिल्यै स्थापित पन्च ईभीको नयाँ संस्करण आउँदैछ भने अर्कोतर्फ लीपमोटरले बी–०३ एक्समार्फत नयाँ प्रतिस्पर्धी प्रवेश गराउँदैछ।

दुवै गाडीको मूल्य सार्वजनिक हुन बाँकी छ। पन्च ईभीलाई सिप्रदी ट्रेडिङले तथा बी–०३ एक्सलाई साँग्रिला मोटर्सले नेपाली बजारमा ल्याएको हो।

पन्च ईभी नेपाली ग्राहकका लागि परिचित नाम हो। नयाँ संस्करणमा कम्पनीले ब्याट्री क्षमता बढाउनुका साथै बाहिरी डिजाइन र भित्री भागमा समेत उल्लेख्य परिमार्जन गरेको छ।

नयाँ पन्च ईभीमा ३० किलोवाट आवर र ४० किलोवाट आवरका दुई ब्याट्री विकल्प उपलब्ध छन्। यसअघि बिक्री हुँदै आएको मोडलमा २५ किलोवाट आवर र ३५ किलोवाट आवरका ब्याट्री प्रयोग गरिएको थियो। अर्थात् नयाँ संस्करणमा दुवै विकल्पको ब्याट्री क्षमता ५ किलोवाट आवरले बढेको छ।

ब्याट्री ठूलो भएसँगै लामो दूरी यात्रा गर्न चाहने ग्राहकका लागि नयाँ पन्च ईभी थप उपयोगी हुने अपेक्षा गरिएको छ। चार्जिङ क्षमतामा पनि सुधार गरिएको छ। यसले ६५ किलोवाटसम्मको डीसी फास्ट चार्जिङ लिन सक्नेछ।

डिजाइनतर्फ नयाँ पन्च ईभीमा टाटाका ठूला विद्युतीय एसयूभीबाट प्रभावित स्वरूप देखिन्छ। यसमा १६ इन्चका एरो–अप्टिमाइज्ड अलोय ह्वील प्रयोग गरिएको छ। अगाडिको भाग र पछाडिको लाइट डिजाइनमा परिवर्तन गरिएको छ भने समग्र बाहिरी स्वरूपलाई अझ आधुनिक बनाइएको छ।

केबिनमा पनि नयाँपन थपिएको छ। १०.२५ इन्चको इन्फोटेनमेन्ट स्क्रिनसँगै समान आकारको डिजिटल ड्राइभर डिस्प्ले उपलब्ध छ। ट्रिम रङ तथा ड्यासबोर्ड फिनिसमा समेत परिमार्जन गरिएको छ।

उच्च भेरियन्टमा वायरलेस चार्जिङ, भेन्टिलेटेड सिट, एम्बियन्ट लाइट, कनेक्टेड कार प्रविधि र ३६० डिग्री क्यामेरा जस्ता सुविधा पाउन सकिन्छ।

सुरक्षाका लागि ६ एयरब्याग, इलेक्ट्रोनिक स्टेबिलिटी कन्ट्रोल, हिल होल्ड असिस्ट, टायर प्रेसर मोनिटरिङ सिस्टम, आईएसओफिक्स चाइल्ड सिट माउन्ट र हाइ बिम असिस्टलगायतका सुविधा राखिएका छन्।

नेपाली बजारमा पहिलोपटक लीपमोटर बी–०३ एक्स आकारका हिसाबले यो बीवाइडी एटो–२ आसपासको वर्गमा प्रतिस्पर्धा गर्ने एसयूभीका रूपमा आएको हो। बी–०३ एक्समा १४५ किलोवाटको विद्युतीय मोटर र ५३ किलोवाट आवरको ब्याट्री जडान गरिएको छ। कम्पनीका अनुसार यसले एकपटक पूर्ण चार्ज गरेपछि सीएलटीसी मापदण्डअनुसार ५०५ किलोमिटरसम्म यात्रा गर्न सक्छ।

चार्जिङमा पनि यसको दाबी बलियो छ। डीसी फास्ट चार्जर प्रयोग गर्दा ब्याट्रीलाई ३० प्रतिशतबाट ८० प्रतिशतसम्म पुर्‍याउन करिब १६ मिनेट लाग्ने कम्पनीले जनाएको छ। यसको ऊर्जा खपत १०० किलोमिटर यात्रामा १०.७ किलोवाट आवर रहेको बताइएको छ।

बी–०३ एक्सको लम्बाइ ४२७० मिलिमिटर, चौडाइ १८१० मिलिमिटर, उचाइ १६३५ मिलिमिटर र ह्वीलबेस २६०५ मिलिमिटर छ। यसमा १८ इन्चका अलोय ह्वील प्रयोग गरिएको छ।