अटोमोबाइल क्षेत्रको कुम्भ मेला: भृकुटीमण्डपमा यसरी बन्दैछ स्टल
नेपाल क्लिक्स
काठमाडौँ: नेपालको अटोमोबाइल तथा मोबिलिटी क्षेत्रको प्रमुख प्रदर्शनी ‘एचपी ल्युब्रिकेन्ट्स प्रिजेन्ट्स १८औँ नाडा अटो शो २०२६’ को तयारी अन्तिम चरणमा पुगेको छ। आगामी भदौ ९ देखि १४ गतेसम्म काठमाडौंको भृकुटीमण्डपमा आयोजना हुने प्रदर्शनीका लागि अहिले स्टल निर्माण तथा अन्य प्राविधिक तयारी तीव्र पारिएको छ।
प्रदर्शनीस्थलमा विभिन्न अटोमोबाइल ब्रान्ड, अटो पार्ट्स तथा कम्पोनेन्ट, टायर, ल्युब्रिकेन्ट्स, ब्याट्री, चार्जिङ पूर्वाधार, ग्यारेज उपकरण, बैंक तथा बीमा कम्पनीका स्टल निर्माणको काम भइरहेको छ। आयोजक नाडा अटोमोबाइल्स एसोसिएसन अफ नेपालका अनुसार यस वर्षको अटो शो नाडाको ५०औँ स्थापना वर्षको स्वर्ण जयन्ती संस्करणका रूपमा आयोजना हुँदैछ।
करिब तीन लाख वर्गफिट क्षेत्रफलमा आयोजना हुने प्रदर्शनीमा २०० भन्दा बढी स्टल रहनेछन्। यात्रुवाहक सवारीका २३, हल्का व्यावसायिक सवारीका १७ र दुईपांग्रे सवारीका १३ गरी कुल ५३ वटा सवारीसाधन ब्रान्डको सहभागिता रहने आयोजकले जनाएको छ।
अटो शोमा विद्युतीय सवारीसाधन, अत्याधुनिक अटोमोबाइल प्रविधि तथा मोबिलिटी क्षेत्रका नयाँ उत्पादन र सेवाहरू प्रदर्शन गरिनेछन्।
त्यस्तै, करिब ७० वटा स्टलमा अटो पार्ट्स, टायर, ब्याट्री, ल्युब्रिकेन्ट्स, एसेसरिज तथा ग्यारेज उपकरण राखिनेछन्। बैंक तथा वित्तीय संस्था र बीमा कम्पनीहरूको पनि उल्लेख्य सहभागिता रहनेछ।
प्रदर्शनी नजिकिँदै गर्दा भृकुटीमण्डपमा स्टल निर्माणको चहलपहल बढेको छ। स्टल निर्माणसँगै विद्युत् जडान, प्रकाश व्यवस्थापन, डिजिटल डिस्प्ले, ब्रान्डिङ तथा अन्य प्राविधिक पूर्वाधार निर्माणको काम पनि समानान्तर रूपमा अघि बढिरहेको छ।
यस वर्षको विशेष आकर्षणका रूपमा ‘मेड इन नेपाल, मेड फर नेपाल’ पभेलियन रहने आयोजकले जनाएको छ। उक्त पभेलियनमार्फत नेपालमै उत्पादन वा एसेम्बल गरिएका सवारीसाधन, विद्युतीय सवारी, ब्याट्री, हेल्मेट तथा अन्य अटोमोबाइल कम्पोनेन्टको प्रवर्द्धन गरिनेछ।
नाडाका अनुसार अटो शोले उपभोक्ता, व्यवसायी, वितरक, वित्तीय संस्था तथा अटोमोबाइल क्षेत्रका अन्य सरोकारवालाबीच प्रत्यक्ष सम्पर्क र व्यावसायिक अन्तर्क्रियाको अवसर प्रदान गर्नेछ। साथै, नेपाली अटोमोबाइल तथा मोबिलिटी बजारमा भित्रिएका नयाँ प्रविधि, उत्पादन र सेवाका साथै क्षेत्रको भावी सम्भावनाबारे जानकारी लिन पनि प्रदर्शनी उपयोगी हुने अपेक्षा गरिएको छ।
भदौ ९ देखि १४ गतेसम्म सञ्चालन हुने नाडा अटो शो २०२६ लाई आयोजकले नेपालको अटोमोबाइल तथा मोबिलिटी क्षेत्रको प्रमुख व्यावसायिक मञ्चका रूपमा प्रस्तुत गरेको छ।
‘मिनी टिलर’ गोरुको विकल्प बन्दै
ईभीमा प्राइसवारको असरः बीवाईडीको आम्दानी अनुमानभन्दा कम, नाफा १.५ अर्ब डलर
हेटौँडा–सिस्नेरी–फर्पिङ सडकमा टाइम कार्ड लागू, कुन खण्ड पार गर्न कति समय लाग्छ ?
सार्वजनिक सवारीमा अग्नि नियन्त्रक यन्त्र अनिवार्य गरिँदै
एफएनसीसीआई यातायात तथा पारवहन समिति उपसभापतिमा मेघराज पौडेल मनोनित
जहाँ संकट, त्यहाँ अम्बिका
‘जनकपुरमा २ अर्बको होटलदेखि मुक्तिनाथसम्म लगानी गर्दैछौँ’ [अन्तर्वार्ता]
विश्वको तेल भण्डार १८ खर्ब ब्यारेल, मध्यपूर्वको हिस्सा ४८ प्रतिशत बढी
पौने तीन अर्बमा कुपन्डोलमा पाँचतारे ‘हायात प्लेस’ होटल बन्दै, दुई वर्षमा सञ्चालन हुने
भैरहवामा ४ अर्ब २० करोडको अत्याधुनिक अस्पताल अन्तिम चरणमा, पुसदेखि सञ्चालन गर्ने तयारी
