सर्वसाधारणलाई बेनी हाइड्रोपावरको आईपीओ खुल्ला, यस्तो छ कम्पनीको वित्तिय अवस्था

काठमाडौँः बेनी हाइड्रोपावर प्रोजेक्ट लिमिटेडले आजदेखि सर्वसाधारणका लागि आईपीओ निष्काशन तथा बिक्री खुला गरेको छ। आयोजना प्रभावित स्थानीय बासिन्दा, वैदेशिक रोजगारीमा रहेका नेपाली, कर्मचारी तथा सामूहिक लगानी कोषतर्फको सेयर बाँडफाँटपछि कम्पनीले आईपीओको दोस्रो चरणअन्तर्गत सर्वसाधारणका लागि सेयर बिक्री खुला गरेको हो।

कम्पनीले सर्वसाधारणका लागि ८ लाख ६३ हजार २०० कित्ता सेयर निष्काशन गरेको छ। प्रतिकित्ता १०० रुपैयाँ अंकित मूल्य तोकिएको यस निष्काशनबाट कम्पनीले ८ करोड ६३ लाख २० हजार रुपैयाँ पूँजी जुटाउनेछ।

लगानीकर्ताले आईपीओमा न्यूनतम १० कित्ता र अधिकतम १० हजार कित्ताका लागि आवेदन दिन सक्नेछन्। निष्काशनमा आवेदन दिने म्याद छिटोमा भदौ २५ गतेसम्म रहेको छ भने सो अवधिमा पर्याप्त आवेदन नपरेमा असोज ५ गतेसम्म आवेदन खुला रहनेछ।

आईपीओमा आवेदन दिनुअघि कम्पनीको वित्तीय तथा व्यावसायिक जोखिमलाई समेत हेर्नुपर्ने देखिन्छ। कम्पनीले आईपीओ निष्काशनका लागि गराएको रेटिङमा इक्रा नेपालबाट ‘इक्राएनपी इस्यूअर रेटिङ डबल बी प्लस’ प्राप्त गरेको छ। यो रेटिङले कम्पनीको दायित्व पूरा गर्ने क्षमतामा औसत जोखिम रहेको संकेत गर्छ।

कम्पनीले १९.८ मेगावाट क्षमताको माथिल्लो सोलुखोला जलविद्युत आयोजना सञ्चालन गरिरहेको छ। आयोजनाको कुल अनुमानित लागत ३ अर्ब ८५ करोड ५१ लाख ७५ हजार रुपैयाँभन्दा बढी रहेको छ। प्रतिमेगावाट लागत करिब १९ करोड ४७ लाख रुपैयाँ पुगेको कम्पनीले जनाएको छ।

आयोजनाको विद्युत अनुमतिपत्रको अवधि अझै २४ वर्ष बाँकी रहेको छ। कम्पनीका अनुसार आयोजनाको साधारण लगानी फिर्ता हुने अवधि ५.७८ वर्ष र डिस्काउण्टमा लगानी फिर्ता हुने अवधि ८.१५ वर्ष रहेको छ।

कम्पनीको जारी पूँजी १ अर्ब ४ करोड रुपैयाँ रहेको छ। यसको २० प्रतिशत बराबर २० लाख ८० हजार कित्ता साधारण सेयर निष्काशन गर्ने अनुमति कम्पनीले पाएको थियो।

यसअघि आयोजनाबाट प्रभावित स्थानीय बासिन्दाका लागि १० लाख ४० हजार कित्ता र वैदेशिक रोजगारीमा रहेका नेपालीका लागि १ लाख ४ हजार कित्ता शेयर निष्काशन गरी बाँडफाँट गरिसकिएको छ। त्यस्तै, कम्पनीका कर्मचारीका लागि २० हजार ८०० कित्ता तथा सामूहिक लगानी कोषका लागि ५२ हजार कित्ता शेयर छुट्याइएको थियो।

यी हिस्सा पूरा गरेपछि बाँकी रहेको शेयरमध्ये अहिले सर्वसाधारणका लागि ८ लाख ६३ हजार २०० कित्ता सेयर निष्काशन गरिएको हो।

कहाँबाट दिने आवेदन?

आईपीओमा सी–आस्बा सदस्य बैंक तथा वित्तीय संस्थामार्फत आवेदन दिन सकिनेछ। लगानीकर्ताले मेरो सेयरमार्फत पनि अनलाइन आवेदन दिन सक्नेछन्।

आईपीओको निष्काशन तथा बिक्री प्रबन्धक एनएमबि लिमिटेड रहेको छ।

लगानीकर्ताका लागि मुख्य कुराः आईपीओको अंकित मूल्य १०० रुपैयाँ भए पनि आवेदन गर्नु अघि कम्पनीको रेटिङ, आयोजना लागत, ऋण तथा वित्तीय अवस्था, विद्युत उत्पादनको जोखिम र भविष्यको आम्दानीसम्बन्धी विवरण अध्ययन गर्नु महत्वपूर्ण हुन्छ।