लाभांश प्रस्ताव पारित गर्न ग्लोबल आइएमई बैंकले बोलायो साधारण सभा

काठमाडौँः ग्लोबल आइएमई बैंक लिमिटेडले २०औँ वार्षिक साधारण सभा बोलाएको छ। बैंकले आगामी असोज १६ गते शुक्रबार काठमाडौँको भृकुटीमण्डपस्थित नेपाल पुलिस क्लबमा साधारण सभा आयोजना गर्न लागेको हो।

बिहान ९ बजे सुरु हुने सभाले गत आर्थिक वर्षको मुनाफाबाट सेयरधनीलाई वितरण गर्ने प्रस्तावित लाभांश पारित गर्नेछ। बैंकले हाल कायम चुक्ता पूँजीको ४ प्रतिशत बोनस शेयर र ६ प्रतिशत नगद लाभांश (कर प्रयोजनार्थ समेत) वितरण गर्ने प्रस्ताव अघि सारेको छ।

लाभांश तथा साधारण सभा प्रयोजनका लागि बैंकले असोज ५ गते एक दिन बुकक्लोज गर्ने भएको छ। त्यसैले असोज २ गतेसम्म नेप्सेमा कारोबार भई कायम रहेका सेयरधनीले प्रस्तावित लाभांश प्राप्त गर्नुका साथै साधारण सभामा सहभागी हुन पाउनेछन्।

सभाले लाभांश प्रस्तावबाहेक बैंकको प्रबन्धपत्र तथा नियमावली संशोधन गर्न सञ्चालक समितिलाई अख्तियारी दिने र आर्थिक वर्षका लागि लेखापरीक्षक नियुक्त गर्ने लगायतका प्रस्तावमाथि पनि निर्णय गर्नेछ।

यससँगै बैंकको प्रस्तावित १० प्रतिशत कुल लाभांशमध्ये ४ प्रतिशत बोनस सेरका रूपमा र ६ प्रतिशत नगद लाभांशका रूपमा वितरण हुने छ। प्रस्ताव साधारण सभाबाट पारित भएपछि मात्र लाभांश वितरणको प्रक्रिया अघि बढ्नेछ।