बैंकमा पैसा राख्नेको प्रतिफल घट्दै, औसत ब्याज ४.०९ प्रतिशतमा झर्‍यो

काठमाडौँः वाणिज्य बैंकहरूले असोज महिनाका लागि मुद्दती निक्षेपको ब्याजदर थप घटाएका छन्। नयाँ ब्याजदरअनुसार व्यक्तिगत मुद्दती निक्षेपको औसत दर भदौको तुलनामा ०.०४ प्रतिशत बिन्दुले घटेर ४.०९ प्रतिशतमा झरेको छ।

असोज १ गतेदेखि लागू हुने गरी एभरेस्ट बैंक, कुमारी बैंक, स्ट्यान्डर्ड चार्टर्ड बैंक र नबिल बैंकले व्यक्तिगत मुद्दती निक्षेपको ब्याजदर घटाएका हुन्। अन्य १६ वाणिज्य बैंकले भने अघिल्लो महिनाकै दरलाई निरन्तरता दिएका छन्।

बैंकहरूले निक्षेपको ब्याजदर घटाएसँगै संस्थागत मुद्दती निक्षेपको औसत दर पनि सामान्य घटेको छ। संस्थागत मुद्दती निक्षेपको औसत ब्याजदर भदौमा ३.०८ प्रतिशत रहेकामा असोजका लागि ३.०७ प्रतिशत कायम भएको छ।

यससँगै असोज महिनामा व्यक्तिगत मुद्दती निक्षेपको औसत ब्याजदर ४ प्रतिशतको हाराहारीमा आएको छ। बैंकहरूले निक्षेपको ब्याजदर निर्धारण गर्दा बजारको तरलता, निक्षेप तथा कर्जाको अवस्था र प्रतिस्पर्धालगायतका पक्षलाई आधार बनाउँदै आएका छन्।

असोजका लागि ब्याजदर यथावत् राख्ने बैंकमा नेपाल बैंक, सिटिजन्स बैंक, सिद्धार्थ बैंक, कृषि विकास बैंक, नेपाल एसबीआई बैंक, लक्ष्मी सनराइज बैंक, ग्लोबल आईएमई बैंक, प्राइम बैंक, प्रभु बैंक, माछापुच्छ्रे बैंक, एनएमबी बैंक, हिमालयन बैंक, सानिमा बैंक, राष्ट्रिय वाणिज्य बैंक, नेपाल इन्भेस्टमेन्ट मेगा बैंक (एनआईएमबी) र एनआईसी एसिया बैंक रहेका छन्।

मुद्दती निक्षेपमा ब्याजदर घट्दै जाँदा बचतकर्ताले बैंकमा निश्चित अवधिका लागि रकम राखेर पाउने प्रतिफलमा पनि असर पर्नेछ।