जनकवि दुर्गालाल श्रेष्ठको स्मृतिमा ‘अक्षरयात्रा–दशक आठ’, ६ कृति लोकार्पण

स्वर्गीय जनकवि दुर्गालाल श्रेष्ठको स्मृतिमा ‘अक्षरयात्रा–दशक आठ’ समारोहको आयोजना गरिएको थियो।

बसन्त चौधरी फाउण्डेशन र दुर्गालाल साहित्य प्रतिष्ठानको संयुक्त आयोजनामा स्वर्गीय जनकवि दुर्गालाल श्रेष्ठको ४५औँ दिनको पुण्यतिथिको अवसरमा विशेष सम्मान र स्मृतिमा कार्यक्रम आयोजना गरिएको हो।

कार्यक्रमको सुरुवातमा जनकवि श्रेष्ठप्रति ‘अक्षरदीप प्रज्वलन, पुष्पार्पण’ र मौनधारण आयोजना गरिएको थियो। कार्यक्रममा जनकवि दुर्गालाल श्रेष्ठको वृत्तचित्र ‘अक्षरयात्रा: दशक आठ’ प्रस्तुत गरिएको थियो।

त्यसैगरी ‘६ नवकृतिः अक्षरका छ नयाँ दीप’ अन्तर्गत श्रव्यदृश्य अनावरण तथा समीक्षा, जनकवि दुर्गालाल श्रेष्ठको कविता वाचन तथा कविता प्रस्तुति पनि गरिएको थियो। कार्यक्रममा ‘अक्षरमहर्षि सम्मान’ अर्पण गरियो।

कार्यक्रममा कवि बसन्त चौधरीद्वारा अक्षराञ्जली समर्पण स्मृति कथन तथा रुबाई प्रतुति गरिएको थियो।

को हुन् जनकवि दुर्गालाल श्रेष्ठ ?
फूलको आँखामा फूलै संसार
काँडाको आँखामा काँडै संसार।
यो जनकवि दुर्गालाल श्रेष्ठको सर्वाधिक लोकप्रिय गीत हो। यो सँगै श्रेष्ठका नेपाल भाषा र नेपाली भाषाका थुप्रै कविता तथा गीतहरू छन्।

स्वर्गीय कवि दुर्गालाल श्रेष्ठले नेपाल भाषा परिषद्बाट सन् २००३ मा जनकविको उपाधि पाउनुभएको थियो। यस्तै मदन पुरस्कार गुठीबाट २०६७ मा जगदम्बाश्री सम्मान समेत पाएका थिए। यीबाहेक उहाँले दजनौँ सम्मान तथा पुरस्कार प्राप्त गरेका थिए।

स्वर्गीय जनकवि दुर्गालाल श्रेष्ठको जन्म विं सं. १९९२ सालमा काठमाडौंमा भएको थियो। आमा आशामोती श्रेष्ठ र बुबा गणेशलाल श्रेष्ठका सुपुत्र दुर्गालाल श्रेष्ठले पद्मोदय माध्यमिक विद्यालयबाट विद्यालय तहको शिक्षा हासिल गरेका थिए। उनले सन् १९४९ मा आफ्नो लेखनयात्रा सुरु गरेका थिए। उनको पहिलो कविता ‘दुई थोपा’ सन् १९५२ मा सुस्केरा पत्रिकामा प्रकाशित भएको थियो।

उनका छ दर्जनभन्दा बढी कृति प्रकाशित छन् भने आज उनका ६ वटा कृति लोकार्पण गरिएको छ।

उनको गत साउन ३१ गते आइतबार बूढानीलकण्ठस्थित आफ्नै निवासमा स्वर्गारोहण भएको थियो।