नारायणगढ–मुग्लिन बाटाको विकल्प बन्ला शक्तिखोर–फिस्लिङ सडक?

भरतपुर– असार लागेपछि पहिरोका कारण नारायणगढ–मुग्लिन सडक खण्डमा पटक–पटक अवरुद्ध हुँदै आएको छ। घन्टौंसम्म सडक सञ्चालन नहुँदा हजारौँ यात्रु सास्ती खेप्न बाध्य भएका छन्। कतिपय यात्रु त अत्यावश्यक काम हुँदा पनि पहिराका कारण गन्तव्यमा पुग्न सक्दैनन्। यो सडक खण्डमा यस वर्ष मात्र होइन, प्रत्येक वर्ष पहिराले दुःख दिने गरेको छ। नारायणगढ–मुग्लिन सडक खण्डको सास्तीले वैकल्पिक राजमार्ग बनाउनुपर्छ भन्ने कुरा पटक–पटक उठ्ने गरेको छ।

यो राजमार्गको विकल्पका रूपमा चितवनमै अर्को पनि सडक छ। त्यो सडक हो– शक्तिखोर–फिस्लिङ ग्रामीण सडक। यो सडक खण्डको अधिकांश काम सकिएको छ। साना सवारी र मोटरसाइकलमा यो सडक खण्ड हुँदै यात्रा गर्न सकिन्छ। तर, यो सड कखण्डको काम पूर्ण नहुँदा र नागरिकलाई पर्याप्त जानकारी नहुँदा वैकल्पिक सडकको रूपमा प्रयोगमा आउन सकेको छैन।

पृथ्वी राजमार्गअन्तर्गत फिस्लिङबाट शक्तिखोरसम्मको ४५ किलोमिटरको दूरी रहेको यो सडक ‘सिंगल लेन’को हो। नारायणगढ– मुग्लिन सडक खण्डमा बारम्बार सास्ती बेहोरेका यात्रुले फिस्लिङ–शक्तिखोर सडकलाई विकल्पका रूपमा पनि प्रयोग गर्न सक्ने इच्छाकामना गाउँपालिका अध्यक्ष दानबहादुर गुरुङ बताउँछन्।

यो सडक पूर्णरूपमा निर्माण सम्पन्न भएपछि इच्छाकामना गाउँपालिकाको विकासको ढोका खुल्ने उनको भनाइ छ। अहिले पनि नारायणगढ–मुग्लिन सडक खण्डमा पहिरो गएको समय कतिपय यात्रुले यो सडक खण्ड प्रयोग गर्ने गरेको उनले बताए।

इच्छाकामना गाउँपालिका–३ का अध्यक्ष नरबहादुर नेपालले रिग्दीखोलामा पुल निर्माण नभएका कारण यो सडक खण्ड पूर्णरूपमा सञ्चालनमा आउन नसकेको जानकारी दिए। ‘प्रदेश सरकारबाट पुल निर्माणको काम त सुरु भएको छ, तर निर्माण सम्पन्न भएपछि मात्र सहज रूपमा यात्रा गर्न सकिन्छ’, उनले भने। तोलाङको भीरमा पहिरो गएका कारण बोलेरो गाडी मात्र छिर्न सक्ने अवस्था रहेको उनले जानकारी दिए।
यो सडकले फिस्लिङ–तोलाङ–बाँसपुर–ओर्लाङ–मायाटार–तेर्से–उपरदाङगढी–शक्तिखोर जोड्छ।

प्राविधिक समस्याका कारण चार ठाउँमा सडक कालोपत्र नगरिएको ग्रामीण सडक सञ्जाल सुधार आयोजनाका इन्जिनियर राकेश रोशनले जानकारी दिए। उनले केही खोल्सा र खोलामा पुल निर्माणको काम बाँकी रहेको भन्दै त्यो प्रदेश सरकारबाट निर्माण भइरहेको बताए।

ग्रामीण सडक सञ्जाल सुधार आयोजनाअन्तर्गत एसियाली विकास बैंकको अनुदानमा ८७ करोडको लागतमा ठेक्का सम्झौता भएको सडकको समयमै काम सम्पन्न नगरेका कारण निर्माण कम्पनीलाई क्षतिपूर्ति तिराउने तयारी गरिएको इन्जिनियर रोशनको भनाइ छ। उनले भने, ‘बाँकी काम सम्पन्न गर्ने दायित्व पनि यही निर्माण कम्पनीको हो। यो वर्ष जसरी पनि काम सक्न भनेका छौँ’, ५/६ महिनामै यो सडक खण्डको २५ किलोमिटर क्षेत्रमा कालोपत्रे भएको भन्दै उनले चाहेको खण्डमा एक–दुई महिनाभित्र निर्माण कम्पनीले काम गर्न सक्ने बताए।

२०७५ देखि निर्माण सुरु भएको यो सडक खण्डको पाँचपटक म्याद थप्दा पनि काम सम्पन्न हुन नसकेको हो। अन्तिम पटक चैतसम्म म्याद थियो। तीन वर्षसम्म यही निर्माण कम्पनीले सडक मर्मतको काम गर्नुपर्ने इन्जिनियर रोशनले बताए। केही वर्ष पहिले आरआरएनले १२ करोड खर्चेर यो सडकको ट्रयाक खोलेको थियो। चार दशमलव पाँच मिटर चौडाइको यो सडक अहिलेसम्म ३० किमिमात्रै कालोपत्रे भएको छ।

यो सडक निर्माणको जिम्मा साङछी एन्ड आशीष जेभीले पाएको हो। साङछी एन्ड आशीष जेभीका इन्जिनियर सञ्जयकुमार महतोले आफूहरूले नै यो वर्ष काम सम्पन्न गर्ने बताए। चार ठाउँमा झन्डै पाँच किलोमिटर सडक कालोपत्रे गर्न बाँकी रहेको उनको भनाइ छ। उनले यो सडक खण्ड नारायणगढ–मुग्लिन सडक खण्डको वैकल्पिक मार्ग हुने भन्दै साना सवारीसाधन सञ्चालन गर्न सकिने बताए।

चेपाङको बाहुल्य रहेका पहाडमा कालोपत्रेसहितको सडक निर्माण हुने भएपछि यहाँका स्थानीय खुसी बनेका छन्। स्थानीय वीरबहादुर चेपाङले दिनभर हिँड्नुपर्ने सडक कालोपत्रे भएपछि एक–दुई घन्टामै पार गर्न सकिने बताए। स्थानीय उत्पादनलाई बजारसम्म लैजान सडक निर्माणपछि सहज भएको उनको भनाइ छ।

प्रदेशसभा सदस्य कृष्ण सिलवालले सडक निर्माणपछि पहाडी क्षेत्रमा पर्यटक चहलपहल बढ्ने र शक्तिखोर व्यापारिक केन्द्र बन्ने बताए। उनले मलेखु–भण्डारा चेपाङ मार्गसमेत यो सडकमा जोडिने र नारायणगढ–मुग्लिन सडकको वैकल्पिक सडकका रूपमा विकास हुने धारणा राखे। सिराइचुली, उपरदाङगढी, सिन्ती झरनालाई मूल सडकमा जोड्न प्रदेश सरकार अग्रसर रहेको बताए।