लुम्बिनीमा ८११ किलोमिटर सडक कालोपत्रे

तुलसीपुर– लुम्बिनी प्रदेशमा पछिल्लो पाँच वर्षमा ८११ किलोमिटर सडक कालोपत्रे गरिएको छ। अर्थ मन्त्रालयले सार्वजनिक गरेको आर्थिक सर्वेक्षणअनुसार आर्थिक वर्ष २०७५/७६ देखि चालू वर्षसम्म सो परिमाणमा सडक कालोपत्रे भएको हो।

मन्त्रालयको सर्वेक्षणअनुसार १ हजार ६८ किलोमिटर सडक ग्राभेल र १ हजार ९६४ किलोमिटर सडक कच्ची छ। प्रदेश सरकारले सडक सुरक्षालाई प्राथमिकतामा राखी सडक निर्माण, मर्मत र स्तरोन्नतिको काम अघि बढाएको प्रदेशका अर्थमन्त्री धनबहादुर मास्कीले बताए। उनका अनुसार कृषि सडक, पर्यटन स्थल एवं उद्योगस्थल पहुँच मार्ग, सीमा क्षेत्र सडक कार्यक्रम, प्रदेश गौरवका सडक तथा प्रदेशका प्रमुख राजमार्ग निर्माण एवं स्तरोन्नतिबाट ग्रामीण–सहरी आबद्धता र कृषि उत्पादन तथा बजारीकरणमा टेवा पुगेको छ।

लुम्बिनी प्रदेशका १२ वटै जिल्ला सदरमुकाम पक्की सडक सञ्जालले जोडिएको मन्त्री मास्कीले बताए। लुम्बिनीमा हालसम्म कच्ची, ग्राभेल र कालोपत्र गरी ९ हजार ५९४ किलोमिटर सडक छ।

८९ मोटरेबल पुल

लुम्बिनीमा पछिल्लो वर्षमा ८९ मोटरेबल पुल निर्माण भएका छन्। त्यस्तै, प्रदेशभरि २६ झोलुंगे पुल निर्माण भएका छन्। चालू आवमा मात्रै १७ मोटरेबल पुल र तीन झोलुंगे निर्माण भएका छन्। लुम्बिनीमा चालू आवमा २४८ मेगावाट विद्युत् उत्पादन भएको छ।

प्रदेशमा ३ हजार मेगावाट विद्युत् उत्पादनको क्षमता रहेको मन्त्री मास्कीले बताए। लुम्बिनीमा ९८.३२ प्रतिशत जनसंख्या विद्युतको पहुँचमा पुगिसकेको छ।

रोल्पा र रुकुम पूर्व सबैभन्दा कम विद्युतीकरण भएका जिल्ला हुन्। लुम्बिनीमा परम्परागत ऊर्जा प्रयोग गर्ने जनसंख्या ५६.४ प्रतिशत रहेको छ भने अन्य वैकल्पिक स्रोत प्रयोग गर्ने ४३.६ प्रतिशत छन्।