जनगणनाको पूर्ण प्रतिवेदन सार्वजनिक, व्यक्तिको संख्या प्रारम्भिक विवरणभन्दा कम

काठमाडौं- राष्ट्रिय तथ्याङ्क कार्यालयले २०७८ सालमा भएको जनगणनाको पूर्ण विवरण सार्वजनिक गरेको छ। विवरणनुसार नेपालको जंनसंख्या २ करोड ९१ लाख ६४ हजार ५७८ कायम भएको छ।

गत वर्षको माघ १२ गते सार्वजनिक गरिएको प्रारम्भिक विवरणमा नेपालको कुल जनसंख्या २ करोड ९१ लाख ९२ हजार ४८० रहेको थियो। प्रारम्भिक विवरणभन्दा यस विवरणमा २७ हजार ९०२ कम जंनसंख्या गणना भएको छ।

प्रधानमन्त्री पुष्षकमल दाहालले काठमाडौंमा आयोजित ‘राष्ट्रिय जनगणना-२०७८ नतिजा सार्वजनिक कार्यक्रम’मा नेपालको पछिल्लो जनगणनाको अन्तिम नतिजा सार्वजनिक गरेका हुन्।

२०७८ को जनगणनाअनुसार सबैभन्दा बढी जनसंख्या वाग्मती प्रदेशमा रहेको छ। बागमती प्रदेशमा कुल जनसंख्याको २०.९७ प्रतिशत अर्थात् ६१ लाख २० हजार जनसंख्या रहेको छ। मधेश प्रदेशमा ६१ लाख १० हजार जनसंख्या रहेको छ। सबैभन्दा कम जनसंख्या भएको प्रदेश भने कर्णाली हो। कर्णालीमा कुल जनसंख्याको ५.७९ प्रतिशत जनसंख्या रहेको छ।