कोरियन भाषा परीक्षा आवेदन खुल्यो

काठमाडौं– नेपाली श्रमिकको रोजगार गन्तव्य बन्दै गएको दक्षिण कोरिया रोजगारमा जान चाहनेलाई लक्षित गरी श्रम तथा रोजगार मन्त्रालयअन्तर्गको इपीएस कोरिया शाखाले कोरियन भाषा परीक्षाका लागि आवेदन मागेको छ। इपीएस कोरिया शाखाले सूचना जारी गर्दै पानीजहाज कम्पनीमा कामदारका रूपमा पठाउने सिलसिलामा उम्मेदवार छनोट गर्न कोरियन भाषा परीक्षा सञ्चालन गरिने बताएको हो।

श्रम तथा सामाजिक सुरक्षा मन्त्रालय र गणतन्त्र कोरिया, श्रम तथा रोजगार मन्त्रालयबीचको समझदारी–पत्रअनुरूप रोजगार अनुमति प्रणालीअन्तर्गत कोरियामा नेपाली नागरिकलाई लैजान लागिएको सूचनामा उल्लेख छ।

कोरिया रोजगारीमा जान चाहने १८ वर्ष पूरा भई ३९ वर्ष ननाघेका नेपाली नागरिकले २० देखि २४ साउनसम्म आवेदन दिन सकिने सूचनामा उल्लेख छ। परीक्षा एकै दिनमा ४ सिफ्ट गरी सञ्चालन हुनेछ। आवेदक संख्याका आधारमा परीक्षा तालिका फेरबदल हुन सक्ने शाखाले बताएको छ।

फौजदारी अभियोगमा सजाय नपाएको, गणतन्त्र कोरियामा गएर गैरकानुनी गतिविधिमा संलग्न नभएको, नेपालले अन्य मुलुकमा जान रोक नलगाएको, कोरियामा इ–९ र इ–९–१ भिसामा पाँच वर्षभन्दा कम अवधि बसेकाले आवेदन दिन पाउने छन्।

सन् २०२३ को कृषि तथा पशुपालन क्षेत्रको भाषा परीक्षा उत्तीर्ण भई सीप परीक्षा दिई बसेका व्यक्तिले समेत यस क्षेत्रको परीक्षा आवेदन दर्ता गराउन सक्नेछन्। कोरियन भाषा परीक्षा उत्तीर्ण हुन भनेको रोजगारीको छनोट प्रक्रियामा सामेल हुन रोस्टरमा सूचीकृत हुने भएकाले शतप्रतिशत रोजगारीको ग्यारेन्टी भने नभएको शाखाले स्पष्ट पारेको छ।