ओलीको निर्देशन विपरीत एमाले लुम्बिनीमा चुनाव गराउने तयारी

बुटवल- एमाले लुम्बिनीको नेतृत्व सर्वसम्मत हुन नसकेपछि चुनाव गराउने तयारी थालिएको छ। अध्यक्षका दुई आकांक्षीबीच सहमति हुन नसकेपछि निर्वाचनको तयारी थालिएको हो।

निर्वाचन समितिले सहमतिका लागि अन्तिम सयमसम्म तयारी गर्ने तर निर्वाचनको तयारी पनि एकसाथ अघि बढाएको हो। आइतबार अबेरसम्म पनि सहमति नभए सोमबार बिहानदेखि मतदानको प्रक्रिया अघि बढाउने तयारी निर्वाचन समितिले थालेको छ।

अध्यक्षका आकांक्षीमा पाल्पाका राधाकृष्ण कँडेल र प्यूठानका हरि रिजाल छन्। कँडेल एमाले प्रदेश कमिटीको तदर्थ समिति अध्यक्ष हुन्। उनी चितवन महाधिवेशनपछि तदर्थ समितिको अध्यक्षमा चुनिएका थिए।

अर्का आकांक्षी रिजाल चितवन महाधिवेशनबाट केन्द्रीय सदस्य चुनिएका हन्। उनी यसअघि लुम्बिनी प्रदेशको मन्त्री बनेका थिए।

एमाले अध्यक्ष केपी शर्मा ओलीले समेत नेतृत्व सर्वसम्मत बनाउने गरी पहल गर्न लुम्बिनी प्रदेशबाट केन्द्रमा पुगेका पदाधिकारीलाई निर्देशन दिएका थिए। तर, त्यो प्रयास सफल हुन नसकेपछि निर्वाचनको तयारी अघि बढेको हो।

‘तपाईँहरू बस्नुस् कुरा टुंगाउनुस, सबै सहमतिमा बाहिर आउनुपर्छ। यस्तो इतिहास बोकेको क्षेत्रमा यति धेरै नेताहरू भएको अवस्थामा विवाद बाहिर आएको सुन्नु नपरोस्। यो पार्टीको क्लियर कुरा हो,’ ओलीले भनेका थिए, ‘तपाईँहरूले आज बसेर सहमति गर्नुस् म भोलि घोषणा गर्छु। लुम्बिनीबाट सिंगो देशवासीलाई, पार्टी कमिटीलाई सन्देश दिनुपर्ने छ।’

रिजालले आफ्नो प्यानलबाट उपाध्यक्षमा पाल्पामा नारायण आचार्य, सचिवमा रुपन्देहीका विश्वराज बराल (अनुप), उपसचिवमा बाँकेका रत्न खत्रीलाई अघि सारेका छन्। त्यस्तै वर्तमान अध्यक्ष कँडेलले उपाध्यक्षमा रुपन्देहीका भोजप्रसाद श्रेष्ठ, सचिवमा दाङका लक्ष्मण आचार्य र उपसचिवमा रोल्पाका पूर्ण बुढामगरलाई अघि सारेका छन्।

एमाले सचिव एवं लुम्बिनी प्रदेश इन्चार्ज पद्मा अर्यालले सर्वसम्मत हुन नसके निर्वाचनको प्रक्रियामा जाने बताइन्। ‘सर्वसम्मत गराउने प्रयास अझै जारी नै छ,’ उनले भनिन्, ‘नभए भोलि बिहान मतदानबाटै टुंगो लाग्छ।’ अध्यक्ष ओलीले आफूले सबै जिम्मेवारी इन्चार्ज अर्याललाई दिएको भन्दै बन्द सत्रमै सर्वसम्मत नेतृत्व चयन गरेर एकताको सन्देश दिन प्रतिनिधिलाई निर्देशन गरेका थिए।

२०५ सदस्यीय प्रदेश कमिटीमा १२ जिल्लाबाट जिल्लागत प्रतिनिधि १८६, अपांगबाट एक,मजदुरबाट ३, खुल्लाबाट पदाधिकारीसहित १५ जना गरी २०५ जना निर्वाचित हुने छन्। पदाधिकारी ५ जना हुनेछन्।