२ घण्टा रोकिएपछि सुरु भयो नेपाल-भारत खेल, २३ ओभरमा झारियो

काठमाडौँ–  श्रीलंकाको पल्लेकेले इन्टरनेसनल क्रिकेट मैदानमा वर्षा भएपछि २ घण्टा रोकिएको खेल पुनः सुरु भएको छ। नेपाल र भारतबीचको खेल भइरहेका बेला ८:१८ बजे वर्षा सुरु भएपछि रोकिएको थियो।

स्थानीय समयअनुसार १०:१५ बजे पुनः सुरु भएको खेल अब २३ ओभरमा सीमित  हुने भएको छ। ओभर घटेसँगै डीएलएस मेथडबाट लक्ष्य पनि समायोजन गरिएको छ। अब नेपालले भारतलाई दिएको लक्ष्य १४५ रनमा झरेको छ।

पुनः वर्षा नभएको खण्डमा खेल हुनेछ। यसअघि खेलको कट अफ टाइम स्थानीय समयअनुसार १०:२० (नेपाली समय अनुसार राती १०:३५ सम्म) रहेको थियो। तर त्यसअघि नै वर्षा रोकिएपछि २३ ओभरमा झारेर खेल अघि बढाउन थालिएको छ।

भारतले २.१ ओभरमा १७ रन बनाउँदा खेल रोकिएको थियो। नेपालले भारतका कुनै पनि विकेट लिन सकेको थिएन। शुभमन गिलले ६ बलमा ३ चौकासहित १२ रन बनाएका छन् भने रोहित शर्माले ७ बलमा १ चौकासहित ४ रन बनाएर टिमका लागि १७ रनमा छन्।

यसअघि नेपालले २३१ रनको लक्ष्य दिएको थियो (२३ ओभरमा सीमित हुने भएपछि अब नेपालको लक्ष्य १४५ रनमा झरेको छ)। नेपालले ४८.२ ओभरमा अलआउट हुँदै उक्त लक्ष्य दिएको हो। भारतविरुद्ध नेपालका ओपनर आसिफ शेखले अर्धशतक बनाएका थिए। आसिफले ८ चौकाको मद्दतमा ५८ रन बनाएका थिए।

अलराउण्डर सोमपाल कामीले ४८ रन जोडेका थिए। ओपनर कुशल भुर्तेलले ३८ रन जोड्दा दिपेन्द्र सिंह ऐरी २९ र गुल्सन झा २३ रन बनाएर आउट भएका थिए।

सन्दीप लामिछाने ९, भीम सार्की ७, कप्तान रोहितकुमार पौडेल ५ रन बनाउँदा कुशल मल्ल दुई रनमै आउट भए भने करण केसीले २ रन जोडे। बलिङमा भारतका रविन्द्र जडेजा र मोहमद सिराजले ३–३ विकेट लिए। मोहम्मद शामी, पाण्ड्या र शार्दुल ठाकुरको नाममा १–१ विकेट रह्यो।