विराटनगर पुगेर प्रचण्डले दिएका तीन सन्देश

विराटनगर-  प्रधानमन्त्री तथा नेपाल कम्युनिस्ट पार्टी (माओवादी केन्द्र) का अध्यक्ष पुष्पकमल दाहाल ‘प्रचण्ड’ले विराटनगर पुगेर तीन सन्देश प्रवाह गर्न कोसिस गरेका छन्। पहिलो आफ्नो प्रधानमन्त्रीत्वकाल सफल भएको, दोस्रो राजनीतिका नयाँ पुस्ताप्रतिको वितृष्णा र  तेस्रो चाहिँ कोशी आन्दोलनमा ढुलमूले प्रवृत्ति। विराटनगर सम्बोधनले उनको सकारात्कता, नकारात्मकता र द्वैध चरित्रलाई एकसाथ उजागर गरेको छ।

समाजवादी मोर्चाको सन्देश सभामा सम्बोधन गर्दै उनले वैदेशिक रोजगारीमा रहेका लाखौं युवाहरूको भविष्य खोज्न आफू गम्भीरतापूर्वक लागिरहेको दाबी गरे। ‘यसपटक के गरी उनीहरूको हितरक्षा हुन्छ, के गरी उनीहरूको सुरक्षा र आत्मसम्मान हुन्छ, के गरी देशभित्रै रोजगारी सिर्जना गर्न सकिन्छ, त्यसमा गम्भीरतापूर्वक लागेको छु,’ उनले थपे, ‘विदेशमा रहेका लाखौं युवाहरूलाई सामाजिक सुरक्षा कोषमा आवद्ध गर्ने प्रक्रिया सुरू गरेका छौँ। केही महिनाभित्र विदेशमा रहेका २५ लाख नेपाली युवाहरूलाई कोषमा आवद्ध गर्छौं।’

यसपटक कुरा मात्र नभएर काम र एक्सनबाट केही नयाँ गर्न चाहना भएको उनको भनाइ थियो। आफू प्रधानमन्त्री बनेपछि देशमा क्रमशः उत्साह पैदा भएको, जनतामा भरोसा बढेको र आशा जागेको बताएका उनले निरासालाई चिर्ने, समाजवादको आधार तयार पार्न भूमिका खेलिएको जिकिर गरे।

प्रदेशको नामाकरणबारे बोल्दै प्रधानमन्त्रीले विवादलाई संवादको माध्यमबाट समाधान गर्न सकिने बताए। ‘एकथरि मान्छेहरू सामाजिक सद्भाव खल्बलाउने र जातीय द्वन्द्व भड्काएर परिवर्तनको उपलब्धि उल्टाउने बहाना खोजिरहेका छन्। त्यसमा हामी सतर्क रहनुपर्छ,’ उनले थपे, ‘परिवर्तनका पक्षमा लाखौं जनतालाई सडकमा ल्याएर प्रतिगमनको हावाहुरी समाप्त पार्नुपर्छ।’

केही दिनअघि धरानमा गोवधको विरोधमा हिन्दू धर्मावलम्बीहरू विरोध गरेका थिए। त्यसको विरोधमा धरानमा हिन्दू धर्मावलम्बीहरुले विरोध प्रदर्शनको तयारी गरेपछि भदौ ९ गते शनिबार निषेध आदेश जारी गरिएको थियो। धरानको सामाजिक सद्भाव कायम गर्न सार्थक प्रयास नगरेको आरोप एकातिर त्यहाँका मेयर हर्क साम्पाङलाई लाग्ने गरेको छ।

अर्कोतिर माओवादी केन्द्रप्रति पनि लक्षित टिप्पणी भइरहेको छ। कोशी नामकरणका पक्षमा मतदान गरेको माओवादी पछि भने पहिचान पक्षधरलाई उकासेको आरोप खेपिरहेको छ। माओवादीका नेताहरूले नै प्रदेशको नाम परिवर्तन गरेपछि यसको असर धार्मिक/जातीय सद्भाव खलल पार्ने हदसम्म पुगेको टिप्पणी भइरहेको छ। सोमबारको उनको सम्बोधन द्वैध चरित्रको देखिएको छ। एकातिर संवादका माध्यमबाट समस्या समाधान गर्ने कुरा उनले उल्लेख गरेका  छन् भने अर्कोति आन्दोलनको आँधीबेहरी सिर्जना गर्ने बताइरहेका छन्।

नया खुलेका दल र स्वतन्त्र मेयरहरू हर्क साम्पाङ/बालेन्द्र साहप्रति प्रचण्ड सकारात्मक सुनिएनन्। परिवर्तनका लागि आफूहरूले जति योगदान अरु कसैले नगरेको उनको जिकिर हल्लिएको छैन। यद्यपि नयाँ पुस्ताको झुकावबारे उनी अनभिज्ञ छन्। नयाँहरुप्रति लक्षित गर्दै उनले राजनीतिमा कुनै योगदान नभएको  र देशप्रति कुनै चिन्ता/सरोकार नभएकाहरूको हावाहुरी देखिएको भनाइ राखे।

‘जसले सबैभन्दा बढी गाली गर्न सक्यो, ऊ नै नेताजस्तो देखाइएको छ। अश्लील, अराजक, कुनै योगदान र दृष्टिकोण नभएको शक्ति र प्रवृत्तिले समाज विशाक्त पार्दैछन्,’ उनले थपे, ‘सामाजिक सञ्जालमा हेर्नै नसकिने दृश्य, सुन्नै नसकिने गाली देखिन्छ, समाजका सबैभन्दा खराब पात्र नै नेता बनाउन खोजिँदैछ, यो देशको भविष्यकै निम्ति गम्भीर कुरा हो। तसर्थ हामी सचेत हुनुपर्छ। देशमा असल संस्कार, असल राजनीति र निष्ठा स्थापित गर्ने जिम्मेवारी हाम्रो हो, अरूले गर्दैनन् र सक्दैनन् पनि।’

सन्देश सभामा नेकपा (एकीकृत समाजवादी)का अध्यक्ष माधवकुमार नेपाल, जनता समाजवादी पार्टीका अध्यक्ष उपेन्द्र यादव, नेपाल कम्युनिस्ट पार्टीका महासचिव नेत्रविक्रम चन्द विप्लवलगायतले सम्बोधन गरेका थिए।