हेटौँडा अस्पतालका ७८ डाक्टरले दिए सामूहिक राजीनामा, आकस्मिकबाहेकका सेवा बन्द

मकवानपुर- मकवानपुरमा चिकित्सक कुटपिटको घटनाको विरोधमा हेटौँडा अस्पतालका ७८ चिकित्सकसहितका स्वास्थ्यकर्मीहरूले सामूहिक राजीनामा दिएका छन्। स्वास्थ्यकर्मी र चिकित्सकले सामूहिक राजीनामा दिएपछि आकस्मिकबाहेकका सबै स्वास्थ्य सेवा बन्द गरिएको अस्पतालले जानकारी दिएको छ।

बुधबार हेटौँडा उपमहानगरपालिका–१ स्थित सन्चो अस्पतालमा डा विकास थापा र प्रशान्त बिडारीमाथि कुटपिट भएको घटनाको विरोधमा स्वास्थ्य सेवा बन्द गरिएको हो। उपचार सेवा प्रवाह गर्न सक्ने अवस्था नरहेको भन्दै चिकित्सक आन्दोलित भएपछि आकस्मिकबाहेकका सबै सेवा बन्द गरिएको हेटौँडा अस्पतालका मेडिकल सुपरिटेन्डेन्ट डा रामचन्द्र सापकोटाले जानकारी दिए।

उक्त घटनाको विरोधमा हेटौँडा अस्पतालको आकस्मिक र फार्मेसी सेवाबाहेक सबै सेवा बन्द गरिएको उनको भनाइ छ। उनका अनुसार अस्पतालमा ओपिडी, बिरामी भर्ना र ल्याबलगायतका सेवा बन्द छन् । जिल्लाका अन्य अस्पताल तथा क्लिनिकमा पनि आकस्मिक र फार्मेसी सेवामात्रै सञ्चालनमा रहेको उनले बताए।

डेङ्गु सङ्क्रमणका कारण एक महिनाअघि मृत्यु भएका हेटौँडा–१२ का ४१ वर्षीय राजेश प्रधानको उपचारमा लापरबाही भएको भन्दै उनका आफन्तसहितका केही युवाको समूहले बुधबार चिकित्सकमाथि अस्पतालभित्रै प्रवेश गरेर कुटपिट गरेका थिए।