छेन्दु आइपुग्यो प्रधानमन्त्रीको टोली

छेन्दु (चीन)- प्रधानमन्त्री पुष्पकमल दाहाल ‘प्रचण्ड’को टोली चीनको छेन्दु आइपुगेको छ। चीन भ्रमणका क्रममा तिब्बतको ल्हासामा रहेको टोली शुक्रबार बिहान उडानबाट छेन्दु आइपुगेको हो।

प्रधानमन्त्रीको टोलीलाई छेन्दु सिचुआन प्रान्तका उपगभर्नर याङ सिङपिङ, विदेश मन्त्रालयको सिचुआन प्रान्तका निर्देशक चाङ ताओ र विदेश मन्त्रालयको एसियाली मामिलासम्बन्धी विभागका प्रमुखले स्वागत गरेका थिए। छेन्दुमा रहँदा उहाँले पाण्डा प्रजनन केन्द्रको निरीक्षण गर्ने कार्यक्रम छ।

प्रधानमन्त्री दाहालको टोली साँझ चिनियाँ कम्युनिस्ट पार्टी (सीपीसी)को सिचुआन प्रान्तीय कमिटीका सचिव वाङ सियाओसँग भेटवार्ता गर्ने कार्यक्रम छ। आजै प्रधानमन्त्रीको सम्मानमा सचिव सियाओले रात्रिभोजको पनि आयोजना गर्दै छन्।

बुधबार चीनको छोङछिङबाट ल्हासा आइपुगेका प्रधानमन्त्री दाहाल बिहीबार कैलाश मानसरोवरको भ्रमण गरेका थिए। दाहालले ल्हासामा रहँदा विभिन्न द्विपक्षीय भेटवार्ता गरे। बुधबार ल्हासास्थित प्राचीन पोताला दरबार र जोखाङ मन्दिरको भ्रमण पनि उनले गरेका थिए।

प्रधानमन्त्री दाहालको टोली शनिबार छेन्दुबाटै काठमाडौँ फर्कने कार्यक्रम छ। शनिबारदेखि दाहाल चीनमा छन्।

भ्रमण दलमा प्रचण्डकी छोरी गङ्गा दाहाल, परराष्ट्रमन्त्री नारायणप्रकाश साउद, भौतिक पूर्वाधार तथा यातायातमन्त्री प्रकाश ज्वाला, प्रधानमन्त्री दाहालका प्रमुख राजनीतिक सल्लाहकार हरिबोल गजुरेल, राष्ट्रिय सुरक्षा सल्लाहकार शङ्करदास बैरागी, मुख्यसचिव डा वैकुण्ठ अर्याल, विभिन्न मन्त्रालयका सचिवलगायत छन्।