बझाङ भूकम्पपीडितको पुनर्स्थापनामा कुनै कमी हुन दिइने छैन : प्रधानमन्त्री

काठमाडौँ– विपद जोखिम न्यूनिकरण तथा व्यवस्थापन परिषदको बैठकले बझाङ भूकम्पपीडितको राहत तथा पुनर्स्थापनाका विषयमा छलफल भएको छ।

छलफलपछि परिषद् अध्यक्षसमेत रहेका प्रधानमन्त्री पुष्पकमल दाहालले सामाजिक सञ्जाल फेसबुकमा पोस्ट गर्दै पीडितको उपचार, राहत र पुनर्स्थापनाका लागि सरकारले कुनै कसर बाँकी नराख्ने उल्लेख गरेका छन्।

‘सरकारका तर्फबाट राहत, उद्दार, उपचार , पुनर्स्थापना तथा पुनर्निर्माणमा कुनै कमी हुन दिइने छैन,’ प्रधानमन्त्री प्रचण्डको पोस्टमा लेखिएको छ।

प्रभावितलाई तत्काल राहत दिन र क्षतिग्रस्त संरचनाको पुनर्निर्माणका लागि आर्थिक तथा अन्य सहयोगको लागि तत्काल प्रक्रिया अघि बढाउन सम्बन्धित निकायलाई निर्देशन दिइएको समेत प्रधानमन्त्रीको पोस्टमा उल्लेख छ।

‘प्राकृतिक विपदले सिर्जना गरेको संकटसँग जुध्न तीनै तहका सरकार, नागरिक समाज, राजनीतिक दल तथा जनसमुदायको एकीकृत र समन्वयात्मक पहलकदमी जरुरी छ,’ बैठकमा प्रधानमन्त्री दाहालको भनाइ थियो।

मंगलबार दिउँसो २:४० बजे ५.३  म्याग्निच्युडको भूकम्प गएपछि बझाङलाई केन्द्रबिन्दु बनाएर भूकम्प र त्यसका परकम्प जाने क्रम जारी छ। मंगलबारदेखि बुधबारसम्म मात्र ४ म्याग्निच्युडभन्दा माथिका दर्जनभन्दा बढी भूकम्प गइसकेका छन्।

भूकम्पमा परी बझाङ एक जनाको मृत्यु भएको छ भने २७ जना घाइते भएका छन्।

बुधबार बसेको सुदूरपश्चिम प्रदेशको मन्त्रिपरिषद् बैठकले भूकम्पमा परी घाइते भएकाहरूको उपचार खर्च प्रदेश सरकारले व्यहोर्ने निर्णय गरिसकेको छ।