एमाले गण्डकी अधिवेशन : हातहातमा पीएस-केआर प्यानलका लिस्ट, गेटबाहिर विवाद

पोखरा-  निर्वाचन कमिटी र अध्यक्ष मण्डलले प्यानलगत प्रतिस्पर्धालाई निषेध गरे पनि मतदान सुरु भएसँगै नेकपा एमाले गण्डकीको अधिवेशनमा प्यानलगत लिस्ट बाहिरिएको छ।

दुवै गुटका समर्थकले धमाधम गुटको लिस्ट मतदानस्थल बाहिर वितरण गरेका हुन्।

लिस्ट वितरणले पोखरा सभागृहको गेटबाहिर विवाद सिर्जनासमेत भएको छ।

अध्यक्ष उम्मेदवार मायानाथ अधिकारीका समर्थकले प्यानल लिस्ट बाँड्दा नवराज शर्मा प्यानलका आदिवासी जनजाति कोटाका सदस्य उम्मेदवार हुमबहादुर गुरुङले खोसेर फालिदिएका थिए।

उनले अनेरास्ववियुका एक युवाको घाँटी समातेका थिए। पछि ती युवाले गुरुङले भुइँमा फालिदिएको लिस्ट टिपेर हिँडे। मतदान अहिले जारी छ।

यो अधिवेशनमा उपमाहासचिव पृथ्वीसुब्बा गुरुङ र स्थायी कमिटी सदस्य खगराज अधिकारी समूहको प्यानल प्रतिस्पर्धामा छ।

म्याग्दीका नवराज शर्मा र लमजुङका मायानाथ अधिकारीले अध्यक्षका लागि उम्मेदवार छन्। शर्मा पार्टी उपमहासचिव गुरुङ र अधिकारी स्थायी कमिटी सदस्य अधिकारीको समूहबाट उम्मेदवार बनेका हुन्।

उपाध्यक्षमा बाबुराम विश्वकर्मा र मीनप्रसाद गुरुङको उम्मेदवारी छ। विक खगराज र गुरुङ पृथ्वीसुब्बा प्यानलका उम्मेदवार हुन्। सचिवमा लमजुङका धनञ्जय दवाडी, कास्कीका रश्मि आचार्यले उम्मेदवार छन्। दवाडी पृथ्वीसुब्बा र रश्मी खगराज प्यानलबाट उम्मेदवार बनेका हुन्।

उपसचिवमा दामबहादुर विक र सन्तोष रावलको उम्मेदवारी छ। विक पृथ्वीसुब्बा र रावल सन्तोषनिकट हुन्।

उम्मेदवारको प्रारम्भिक सूचीमा स्याङ्जाका अर्जुनकुमार सुनामको पनि नाम थियो। उनले पछि आफ्नो उम्मेदवारी फिर्ता लिएका थिए। उपसचिव महिलामा मन्जु अधिकारी प्यासी र मिना गुरुङको उम्मेदवार छन्।

अधिकारी पृथ्वीसुब्बा र गुरुङ खगराज प्यानलका हुन्। पदाधिकारी र सदस्य चयन गर्न प्रदेशका ११ जिल्ला र जनवर्गीय संगठनबाट ९ सय ७ जना प्रतिनिधि मतदाता छन्।

मतदानका लागि ३३ वटा विद्युतिय भोटिङ मेसिन प्रयोग गरिएको छ। अध्यक्षका उम्मेदवार नवराज शर्मा र मायानाथ अधिकारीले मतदान गरेर मतदान कार्यको शुभारम्भ गरिएको निर्वाचन कार्यालयले जनाएको छ।

कार्यालयले दिएको जानकारी अनुसार मतदान कार्यक्रम साँझ साढे ५ बजेसम्म चल्नेछ। मतदान सम्पन्न भएको १ घण्टा पश्चात नतिजा आउने दावी निर्वाचन कार्यालयको छ।