भीरबाट खसेर मनाङमा अमेरिकी पर्यटकको मृत्यु

मनाङ- मनाङमा भिरबाट खसेर एक पर्यटकको मृत्यु भएको छ। मृत्यु हुनेमा अमेरिकी राहदानी नं. ६८१७४२५ का ६९ वर्षीय चार्ल्स केथ डेभिज रहेका छन्।

बुधबार श्रीमती वेथ एन फोड्रियत, गाईड, चालक र भरियासहित बा ६ च ७५६ नम्बरको ल्यान्डक्रुजर गाडीमा लमजुङबाट मनाङ सदरमुकाम चामे जाँदै थिए।

बेसीशहर–चामे सडकखण्ड अन्तर्गत मनाङको नासोँ गापा–३ खोत्रोडाँडाबाट सडकमा झरेको ढुङ्गा पन्छाउने क्रममा राती करिब १० बजे उनी सडकबाट सय मिटर तल मर्स्याङ्दी नदी किनारमा खसेको प्रहरीले जनाएको छ।

जिल्ला प्रहरी कार्यालय र इलाका प्रहरी कार्यालय धारापानीबाट खटिएको प्रहरी टोलीले उनलाई राती सवा १ बजे उद्धार गरी उपचारका लागि मनाङ जिल्ला अस्पताल चामे लगिएको थियो।

राती करिब ३ बजे अस्पताल पुर्‍याउने बित्तिकै चिकित्सकले मृत घोषणा गरेका थिए। जिल्ला प्रहरी कार्यालय, मनाङका सूचना अधिकारी इन्स्पेक्टर पुष्कर कार्कीका अनुसार डेभिजको शवलाई पोस्टमार्टमको लागि एयर डाइनेस्टीको हेलिकप्टरमार्फत् बिहीबार दिउँसो सवा ३ बजे टिचिङ अस्पताल काठमाडौं लगिएको छ।

उनकी श्रीमती, गाईड र भरिया हेलिकोप्टरमै फर्किएका छन्।