इजरायलका नेपाली फर्काउन सरकारले कूटनीतिक पहल गरोस् : देउवा

काठमाडौँ- नेपाली कांग्रेसले इजरायलमा रहेका नेपालीहरूलाई स्वदेश फर्काउन आग्रह गरेको छ।

सभापति शेरबहादुर देउवाले आइतबार विज्ञप्ति निकाल्दै यस्तो आग्रह सरकारलाई गरेका हुन्।

इजरायलमा रहेका नेपालीलाई स्वदेश फर्काउन कुटनीतिक पहल थाल्न उनको आग्रह छ।

‘इजरायलका नेपालीको तथ्याङ्क पत्ता लगाई उनीहरूको जीवनरक्षा र तत्काल सुरक्षित स्थानमा पुर्‍याउन पनि कांग्रेसको माग छ। ‘आवश्यक उद्धार गर्ने र यथासम्भव स्वदेश फर्काउन नेपाल सरकारले अविलम्ब कूटनीतिक पहल गर्न कांग्रेस माग गर्दछ,’ सभापति देउवाले निकालेको विज्ञप्तिमा उल्लेख छ।

इजरायलका नेपालीलाई स्वदेश फर्काउने वातावरण निर्माण गरिदिन मित्रराष्ट्र, अन्तर्राष्ट्रिय मानव अधिकारवादी संघसंस्था, आप्रवाससम्बन्धी संगठन आईओएम, अन्तर्राष्ट्रिय रेडक्रस समितिलगायत सम्बद्ध सबैमा कांग्रेसको आग्रह छ।

हमासले शनिबार इजरायलमा आक्रमण गर्दा नेपालीहरू पनि घाइते भएका छन्। इजरायलमा चार हजार पाँच सय केयरगिभर र दुई सय ६५ जना नेपाली विद्यार्थी थिए।