इजरायलबाट नेपालीको हारगुहार- मिसाइल खस्दा दर्दनाक हुन्छ, बंकर पनि सुरक्षित छैन

काठमाडौं– दाङका विपिन सुवेदी सुदुरपश्चिम प्रदेश कृषि विज्ञान संकायबाट अध्ययनका लागि इजरायल पुगेका उनीसहित ५ जना कृषि विद्यार्थीहरु यतिबेला जीवनमरणको दोसाँधमा छन्।

इजरायलको गाजा क्षेत्रमा भएको द्वन्द्वको चपेटामा उनीहरु छन्। हमास समूहले त्यसक्षेत्रमा निरन्तर आक्रमण गरिरहेको छ। जसका कारण कृषि अध्ययनका लागि नेपालबाट त्यहाँ पुगेका विद्यार्थीहरु त्रसित छ।

१० जना कृषि विद्यार्थीहरुको मृत्यु भएको सरकारले पुष्टि गरिसकेको छ। त्यसक्षेत्रमा ३९ जना कृषि अध्ययन गर्ने विद्यार्थीहरु छन्। बाँकी कतिपय विद्यार्थीहरु घाइते अवस्थामा छन् भने कतिपय बंकरमा लुकेर बसेका छन्।

कतिपयले कृषि अध्ययनरत विद्यार्थीहरुले आफुलाई इजरायलबाट छिटोभन्दा छिटो उद्धार गर्न आग्रह गरिरहेका छन्। कतिपयले भने सरकारले तीनदिसम्म पनि उद्धार नगरेकोमा सामाजिक सञ्जालमार्फत गुनासो र चित्कार सुनाइरहेका छन्।

यसैबीच दाङका विपिन सुवेदीसहित ५ जना विद्यार्थीहरु पनि इजरायलस्थित गाजा क्षेत्रमा बंकरभित्र लुकेर जीवनयाचन रहेका छन्। विगत ३ दिनसम्म पनि सरकारले उद्धार नगरेकोप्रति विपिनले सामाजिक सञ्जालमार्फत एउटा चित्कारपूर्ण भिडियो सेयर गरेका छन्।

जुन भिडियोमा उनीहरुले छिट्टै उद्धार गरी नेपाल जान चाहेको बिलौना गरिरहेको देखिन्छ। ‘म यो भिडियो नबनाउने स्थितिमा थिएँ। किनकी घरका परिवारलाई पीडा हुन्छ भनेर। तर, घरभन्दा माथि उठेर अहिले हामीले देशले केही नगरेको अवस्थामा हामी यो भिडियो बनाउन विवश भएका छौं,’ विपिनले भिडियोमा भनेका छन्।

आफूलाई दूतावासले उद्धार गर्छ भनेर लुगा लगाएर बसेपनि अहिलेसम्म उद्धारको कुनै पहल नगरेको उनको दुखेसो छ।

‘हामी करिब ३ दिन भयो यो बंकरमा बस्न थालेको। हिजो साँझदेखि हामीले एम्बेसीले उद्धार गर्छ कि भनेर हामीहरु लुगा लाएर पनि बसेका छौं,’ लुगा देखाउँदै उनी भन्छन, ‘हामीलाई आस त्यति छ। तर, रातमा यो बंकर पनि माथिबाट मिसाइल खस्दा खेरी निकै दर्दनाक हुन्छ। हामीले १० जना साथीहरु त गुमाइसक्यौं। अझै पनि हामी आफू पनि गुम्छौं कि भन्ने डर छ। १० जना साथीहरुको त्यो चिच्याहट र गुहारहरु सबै चीजको हामीलाई याद आउँछ। जसका कारण रातभर निद्रा लाग्दैन।’

विपिनले आफूहरु बंकरभित्र पनि सुरक्षित नरहेको बताएका छन्। ‘हामी बंकरमा पनि सुरक्षित महसुस गरिरहेका छैनौं। बंकरमा छिर्ने ढोका खुल्लै हुने भएकाले घरीघरी डर लाग्छ,’ उनले भने, ‘मिसाइलले हामी पनि राती क्रुरतापूर्वक मार्यो भने हामीले के गर्ने? कृपया बिन्ती छ, हामी अझै पनि कुर्न सक्दैनौं।’

भारतले एक टिकटरस्टार विद्यार्थीलाई विमान चार्टर गरेर लगेको प्रसंग सुनाउँदै विपिनले भने, ‘हाम्रो नेपाल सरकारले हामी ३९ जनामध्ये १० जना त गुमाइसक्यौं। अझै पनि जति बँचेका छौं, त्यतिलाई त केही न केही त गर्न सकिन्छ नि!’

सरकारले आफूहरुको छिटो उद्धार गरेर नेपाल फर्किएमा आफूहरुले पनि केही गर्ने सोचेको उनले बताएका छन्।

‘देश फर्केर हामीले पनि केही न केही त गर्छौँ होला नि। केही न केही गर्दिओस् सरकारले,’ उनको आग्रह छ।

तीन दिनदेखि उद्धार नभएको रोष व्यक्त गर्दै उनले भिडियोमा भनेका छन, ‘हामीलाई त मिटिङ भइरहेको छ, यतात्यता सुनाउनु पर्दैन म्यासेजमा। हामीले यस्तो गरिरहेका छौं, भनिरहनुपर्दैन। तीन दिनसम्म हामीहरु मानसिक रुपमा निकै नै तनावपूर्ण रुपमा बसेका छौं। राती बंकरमा बस्दा मेरो आफ्नै सास पुग्दैन। मुटु फुट्न खोज्छ। मुख बन्द हुन्छ। कहिलेसम्म हामी यसरी बस्ने?

आफूहरु दिनदिनै बंकरभित्र बस्न नसक्ने भएकाले भिडियो बनाएको उनले बताएका छन्।

‘यो भिडियो हामीले किन बनाएको भने केही हुन्छ कि भनेर बनाएका हौं। तीन रात त यसरी नै बितायौं। आजको रात पनि यहाँ नै बिताउनुपर्यो भने रातले नै हामीलाइ लखेट्नेछ,’ उनले अन्तिममा भनेका छन्, ‘हामी यहाँ कुन परिस्थितिमा छौं, त्यो पीडा राज्यले देखेको छौं। जे भए पनि बिन्ती छ हामीलाइ यहाँबाट उद्धार गरोस् सरकारले। हामी नेपाल फर्कन चाहन्छौं।’

विपिनजस्तै कास्कीको अन्नपूर्ण गाउँपालिका–२ घर भई कृषि अध्ययनका लागि इजरायलमा रहेका सुरज भण्डारीले आफुलाई छिटो उद्धार गरिदिन प्रधानमन्त्री पुष्पकमल दाहाल प्रचण्डलाई खुला पत्र नै पठाएका छन्।

‘अबको हाम्रो आसा पनि तपाइ नै हो, भरोसा पनि तपाइ नै हो। यो दुई देशको चपेटामा परेर ज्यान गुमाउन मन छैन। हामीलाई हाम्रो देश आउने वातावरण मिलाइदिनुहोस्। हामी देशमा नै रमाउनेछौं।’ उनले पत्रमा लेखेका छन्।

उनले नेपालको ३ वटा विश्वविद्यालयलबाट त्यहाँ विद्यार्थीहरु रहेको बताएका छन्। कृषि तथा वन विज्ञान विश्वविधालय, त्रिभुवन विश्वविद्यालय र सुदुरपश्चि विश्वविद्यालयबाट यहाँ केही विद्यार्थी रहेको सुरजले बताएका छन्।

अन्य विद्यार्थी र नेपालीहरु नागरिक पनि त्यहाँ भएको जानकारी दिँदै उनले लेखेका छन्, ‘छिटोभन्दा छिटो नेपाल सरकार र प्रधानमन्त्रीको प्रत्याभुति तपाइले अवश्य गराउनुहुनेछ। यो हाम्रो तपाइप्रतिको विश्वास हो। यहिँ विश्वासमा नै हाम्रो सास अडेको छ।’

विपिन र सुरजलगायत धेरै नेपाली विद्यार्थी र नेपाली नागरिकहरुले सरकारलाई उद्धारका लागि पहल गरिदिन विभिन्न माध्यमबाट अनुरोध गरिरहेका छन्।