इजरायलबाट स्वदेश फर्कन चाहन्छन् दुई सय नेपाली

काठमाडौँ- इजरायलस्थित नेपाली राजदूतावासले इजरायलयबाट २ सय जना नेपालीले स्वदेश फर्कन चाहेको जानकारी दिएको छ। सोमबार विज्ञप्ति जारी गर्दै दूतावासले यस्तो जानकारी गराएको हो।

‘नेपाल फर्कन इच्छुक नेपालीहरुको स्वदेश फिर्तीको लागि राजदूतावासबाट नेपाल सरकार र इजरायल सरकारसँग आवश्यक समन्वय गरी विवरण संकलनको लागि अनलाइन रजिस्ट्रेसन सुरु भई दुई सय भन्दा बढीको विवरण प्राप्त भइसकेको अवस्था छ,’ दूतावासले जारी गरेको विज्ञप्तिमा उल्लेख छ।

दूतावासले नेपाली विद्यार्थीहरूको उद्धार गरी सुरक्षित स्थानमा स्थानान्तरण गर्न सुरू गरिसकेको समेत जानकारी गराएको छ। केही विद्यार्थीहरूको स्थानान्तरण भइसकेको र केही स्थानान्तरण हुने क्रममा रहेको पनि दूतावासले जानकारी दिएको छ।

त्यस्तै दक्षिण इजरायलको किबुज अलुमिममा प्यालेस्टाइनको हमास समूहको आक्रमणबाट ज्यान गुमाएका १० जना नेपालीको शव फिर्ता गर्न पनि दूतावासले इजरायल सरकार तथा सरोकारवाला निकायसँग समन्वय तथा सहकार्य सुरू गरिसकेको विज्ञप्तिमा उल्लेख छ।

‘४ जनाको स्थानीय अस्पतालमा उपचार भइरहेको छ भने दुई जना तेल अभिभ सहरमा सुरक्षित स्थानमा ल्याइसकिएको ,’ विज्ञप्तिमा भनिएको छ, ‘साथै, सम्पर्कविहीन रहेका एक जना नेपालीको खोजीकार्य प्रहरी, अस्पताल लगायत उपलब्ध सम्पूर्ण स्थानीय संयन्त्रको सहयोगमा तिब्र गरिएको छ।’

प्यालेस्टाइनको इस्लामिस्ट समूह ‘हमास’ले शनिबार बिहानदेखि इजरायलमाथि आक्रमण गरेको थियो। एक जना नेपाली सम्पर्कविहीन रहेको समेत दूतावासले जानकारी दिएको छ।