‌पठाओ र इन्ड्राइभका ८३ अफलाइन राइडर प्रहरी नियन्त्रणमा

काठमाडौँ- पठाओ र इन-ड्राइभमा अफलाइन राइड गरेको भन्दै काठमाडौँ प्रहरीले ८३ जना चालकलाई नियन्त्रणमा लिएको छ।

फलाइन राइडमा गर्दा आपराधिक घटना अनुसन्धान गर्न चुनौती बनेकाले उनीहरुलाई नियुन्त्रणमा लिन परेको जिल्ला प्रहरी परिसर काठमाडौंले जनाएको छ।

कार्यालयका प्रवक्ता एवं एसपी कुमोध ढुंगेलका अनुसार कतिपय अपराध कर्म गर्नेहरू अफलाइन राइडरहरूको सहयोगमा भाग्ने पनि गरेका छन्।

राइडरहरूलाई हिरासतमा राख्ने गरी नियन्त्रणमा लिइएको भने होइन। नियन्त्रणमा लिइएका राइडरको विवरण कम्पनीमा पठाइनेछ।

गत वैशाखमा काठमाडौंको कपन सरस्वती नगरमा निरा पाण्डेको पसलमा हत्‍या भएको थियो। धारिलो हतियार प्रहार गरी भागेका अभियुक्तले अफलाइन राइडको प्रयोग गरी भागेका थिए। पछि प्रहरीले अभियुक्तलाई झापाबाट पक्राउ गरियो।

अफलाइन राइडरहरू दुर्घटनामा परे चालक फरार हुने घटना पनि हुने गरेको ढुंगेलको भनाइ छ। केही समयअघि अफलाइन राइड गरेका एक चालक आफैं अपहरणमा समेत परेका थिए।

अफलाइन राइड गर्दा कम्पनीहरूले पनि बीमा सेवा दिँदैनन्। प्रहरीले सर्वसाधरणलाई पनि अफलाइन राइड नगर्न अनुरोध गर्दै आएको छ।