इजरायलबाट फर्कँदै थप १९ नेपाली, गौरीफन्टा नाकाबाट नेपाल भित्रने [नामावलीसहित]

काठमाडौँ- इजरायलमा विद्रोही हमास समूहले आक्रमण गरेपछि स्वदेश फर्किनका लागि अनलाइन आवेदन दिएका १९ जनालाई सरकारले स्वदेश फर्काउने भएको छ।

भारतीय विमानमार्फत् इजरायलमा रहेका १९ जना नेपाली स्वदेश फर्काउन लागिएको हो।

परराष्ट्रमन्त्री एनपी साउदले मंगलबार इजरायलको तेल अबिबबाट भारतको उद्धार विमानमार्फत् १९ नेपालीलाई स्वदेश फर्काइने जानकारी दिए।

‘१९ जना नेपाली नागरिक तेल अविवबाट इन्डियन रेस्क्यु फ्लाइटबाट उड्दै हुनुहुन्छ,’ मन्त्री साउदले भने।

मन्त्रालयले स्थानीय समय अनुसार तेल अविवबाट बिहान ९ बजे स्पाइस जेटमार्फत् १९ नेपाली नागरिक आउने जनाएको छ।

मन्त्री साउदले स्वदेश आउन लागेका नेपालीलाई दिल्लीस्थित दूतावासले सवारी साधनको व्यवस्था गरेर नेपाल पठाउने पनि जानकारी दिए।

नयाँ दिल्लीस्थित दूताबासले इजरायलबाट उद्धार गरी ल्याइएका नेपालीलाई गौरीफन्टा नाका भएर कैलाली भित्र्याइने छ।

कैलालीबाट जिल्ला प्रशासन कार्यालयले उनीहरुलाई सम्बन्धित स्थानमा पुर्‍याउने तयारी गरिएको मन्त्रालयले जनाएको छ।

उनीहरु मंगलबार बेलुका नयाँदिल्लीमा अवतरण हुनेछन्।

यी हुन् उद्धार गरिएका नेपाली नागरिकहरु
नन्दसिंह भुल

सुजेन्द्र खड्का

प्रतिभा रौनियार

अनुमा डंगोल

हिना खाँण

आतिस गुरुङ

जुनु गुरुङ

मौसमी पाख्रिन

प्रतिमा तिम्सिना

राजकुमार मानन्धर

संगीता दुलाल

उर्मिला रावल

ममता थापा

दिलकुमारी अधिकारी कार्की

निश्चल श्रेष्ठ

समिता बस्नेत

अम्बिका सुवेदी

सिरता गुरुङ

उर्मिला श्रेष्ठ

यसअघि २५४ जना नेपालीलाई उद्धार गरी नेपाल फर्काइएको थियो। उनीहरूलाई लिनका लागि परराष्ट्रमन्त्री एनपी साउद नेपाल एयरलाइन्स लिएर इजरायलको तेलअबिब पुगेका थिए।