एनआरएनए अभियानका जोधाह केसी उपाध्यक्षमा भिड्दै, यस्ता छन् एजेन्डा

काठमाडौँ- गैरआवासीय नेपाली संघ एनआरएनएको ११औं महाधिवेशनमा उपाध्यक्षका उम्मेदवार रहेका गणेश केसीले युवाहरुले परदेशमा सिकेको सीपलाई स्वदेशमा प्रयोग गर्ने वातावरण मिलाउनुपर्ने बताएका छन्।

मंगलबार काठमाडौंमा पत्रकाहरुसँग अन्तरक्रिया गर्दै केसीले युवाहरुले विदेशमा सिकेको सिप नेपालमा प्रयोग गर्ने अवस्था बनेमा रोजगारीका अवसर सिर्जना हुने बताएका हुन्।

आफ्नो मुख्य एजेन्डा नै यही रहेको दाबी गरेका उनले देशमै रोजगारी सिर्जना हुँदा युवा पलायनलाई रोक्न सकिने बताए।

‘ऊर्जाशील शिक्षित युवाहरूको विदेश पलायनबाट देशले उनीहरूले पठाउने रेमिटान्स त पाउँछ तर देशको लागि आवश्यक सक्षम ऊर्जनशील युवाहरूको साथ र सहयोग भने अवश्य पाउँदैन,’ उनले भने, ‘पलायन भएका युवाहरूले परदेशमा सिकेका सीपलाई स्वदेशमा प्रयोग गर्ने वातावरण मिलाउने तथा दैनिक हजारौँ युवाको विदेश पलायनलाई रोक्ने संयन्त्रको विकास गर्न सरकार दैनिक रूपमा नै चुकिरहेको छ। देशमा नै सीपमूलक शिक्षाको विकास तथा पर्याप्त रोजगारीको अवसर दिएर उनीहरूलाई पलायन हुनबाट रोक्न सकिन्छ।’

युवाहरुलाई पलायन हुनबाट रोक्ने र पलायन भएकाहरुलाई फर्काउने नीति सरकारले ल्याउनुपर्ने बताएका केसीले शिक्षा प्रणालीमा समेत परिवर्तन गर्नुपर्ने जिकिर गरे।

‘सरकारले बाहिर जाने सोचमा रहेका युवालाई रोक्ने र विदेशिएकालाई फर्काउने नीति ल्याउन आवश्यक छ,’ उनले भने, ‘यसमा सरकारले लगानीको वातावरण बनाउनु पर्दछ। त्यसका साथै शैक्षिक नीति र पाठ्यक्रम परिवर्तन गर्नपर्छ। सीपमूलक शिक्षा र व्यावहारिक शिक्षा दिनुपर्छ।’

सिप नसिकी विदेशिएकाहरुले विदेशमा पनि राम्रो काम पाउन नसकेको उनको भनाइ छ। अदक्ष नेपालीलाई दक्ष बनाउनुपर्नेमा जोड दिँदै आएका उनले नेपालका सातै प्रदेशमा व्यावसायिक सीप तालिम केन्द्र स्थापना गर्ने घोषणा समेत गरे।

रोजगारीका सिलसिलामा विदेश जाँदा अपनाउनुपर्ने प्रकृयाको निःशुल्क परामर्श दिनेदेखि देश विकासमा विदेशमा सिकेका र जानेका सिपलाई नेपालको विकासमा लगाउने योजनामा आफू क्रियाशील रहेको उनको भनाइ छ। उनी एनआरएनएका संस्थापक साधारण सदस्यसमेत हुन्।

उनी यसअघि एनआरएनए अष्ट्रेलियाको अध्यक्ष, अन्तराष्ट्रिय समन्वय परिषद् आइसिसी सदस्य, एनआरएनए आईसीसीका उपमहासचिव र एनआरएनए व्यावसायिक शिक्षा ग्लोबल कमिटीका प्रमुख भएर काम गरिसकेका छन्। उनले एनआरएनएले अगाडि बढाएको हाईड्रो कलेक्टिम इनमेष्टमेन्ट अन्तर्गत कार्यक्रमका लागि अष्ट्रेलियाबाट २७ करोड रुपैयाँ संकलनमा महत्वपूर्ण भूमिका निर्वाह गरेका थिए।

एनआरएनएको भवन निर्माणमा सक्रियतापूर्वक खटेका उनले भवन निर्माणका लागि २ करोड सहयोग संकलन गरेका थिए। मलेसियामा सामाजिक कल्याणकारी कोष स्थापनाको लागि भएको आर्थिक सहयोग संकलन अभियानमा उनले करिव १ करोड रुपैयाँ संकलन गरेका थिए।