चारतिर बाँडिए इजरायलबाट दिल्ली आइपुगेका १८ नेपाली

नयाँदिल्ली- इजरायलबाट भारतको राजधानी नयाँदिल्ली आइपुगेका १८ नेपाली चारतिर विभाजित भएका छन्।

उनीहरूमध्ये ७ जनालाई कञ्चनपुर पठाइएको नयाँदिल्लीस्थित नेपाली राजदूतावासले जानकारी दिएको छ। दिल्लीबाट सवारी साधन रिजर्भ गरी कञ्चनपुर पठाइएको हो। उनीहरू नेपाल प्रवेश गरिसकेका छन्।

बुधबार महेन्द्रनगर (कञ्चनपुर) आइपुग्नेमा कैलाली टीकापुरका नन्दसिंह पुन, नुवाकोट लिखुका राजकुमार मानन्धर, काठमाडौंका लक्ष्मी दुलाल, मोरङ उर्लाबारीका निश्चल सिंह, पाल्पाकी दिलकुमारी अधिकारी, ललितपुरकी ममता थापा र स्याङ्जाकी अस्मिता गुरुङ रहेका छन्।

महेन्द्रनगर आइपुगेका सबैलाई बुधबारै घरतर्फ पठाइने कञ्चनपुरका प्रमुख जिल्ला अधिकारी गोपालकुमार अधिकारीले जानकारी दिए।

गत साता हमासले इजरायलमाथि आक्रमण गरेपछि त्यहाँ रहेका नेपाली नागरिकको उद्धार थालेको हो। यसअघि नेपाल सरकारले चार्टर्ड विमान पठाएर २५४ जनाको उद्धार गरेको थियो।

नयाँदिल्ली आइपुगेका ८ जनाले आफ्नै खर्चमा काठमाडौँका लागि जहाजको टिकट काटेको समेत दिल्ली दूतावासले जानकारी दिएको छ।

दुई जनाले दिल्लीबाट आफ्नै व्यवस्थानमा जान्छु भनेकाले उनीहरूलाई दिल्ली दूतावासबाट बिदा गरिएको छ। थप एक जनाले आफन्तकोमा जान्छु भनी मुम्बई जाने तय भएको दूतावासले जानकारी दिएको छ।

इजरायलबाट अहिलेसम्म २७२ जनालाई फर्काइएको छ।

इजरायलमा हमासको आक्रमणपछि बेपत्ता नेपाली विद्यार्थी विपिन जोशीको अवस्था अझै अज्ञात छ।

असोज २० गते हमासले दक्षिणी इजरायलको किबुज अलुमिनमा आक्रमण गर्दा नेपाली विद्यार्थी कञ्चनपुरका विपिन बेपत्ता भए। उनलाई हमासले बन्धक बनाएको हुन सक्ने आकलन गरिएको छ। बन्धक बनाइएका विदेशी नागरिकहरू आफूहरूका लागि पाहुना भएकाले समय आएपछि उनीहरूलाई रिहा गरिने बताएको छ।

इजरायलमा हमासको आक्रमणमा मारिएका १० मध्ये पाँच नेपालीको शव प्राप्त भएको इजरायलस्थित नेपाली दूतावासले जनाएको छ। प्राप्त शव तीन दिनभित्र नेपाल ल्याउने तयारी भइरहेको परराष्ट्र मन्त्रालयले जानकारी दिएको छ। गत शनिबारदेखि इजरायल र प्यालेस्टाइनको गाजा क्षेत्रमा युद्ध जारी छ।