रेशम-रञ्जिताको ‘झगडा’ नमिलेपछि राजीनामा दिने निर्णयमा पुगे मुख्यमन्त्री शाह

धनगढी-  सुदूरपश्चिम प्रदेशका मुख्यमन्त्री कमलबहादुर शाहले राजीनामा दिने भएका छन्।

प्रदेश प्रमुख नजिर मियाँलाई भेटेर राजीनामा बुझाउने तयारी उनले गरेका हुन्।

कसै गर्दा पनि विश्वासको मत जुटाउन नसक्ने भएपछि उनले राजीनामा दिने निर्णय लिएका हुन्।

मुख्यमन्त्रीले विश्वासको मत लिनका लागि दिउँसो ३ बजे प्रदेश सभाको बैठक बोलाइएको थियोे। तर मुख्यमन्त्रीकै आग्रहमा साँझ ५ बजेसम्मका बैठक सारिएको थियो। बैठक सुरू भएको छैन।

नागरिक उन्मुक्तिमा पार्टीमा देखिएको विवाद साम्य हुन नसक्दा उनले राजीनामा दिनुपर्ने परिस्थिति निर्माण भएको हो।

नागरिक उन्मुक्तिका संरक्षण रेशमलाल चौधरी शाहको सरकारलाई समर्थन गर्ने पक्षमा थिए।

तर रेशमकी श्रीमती तथा नाउपाकी अध्यक्ष संघीय सत्ता गठबन्धनसँग मिल्ने तर मुख्यमन्त्री शाहको पक्षमा नआउने अडान लिएपछि शाहले राजीनामा दिनुपर्ने अवस्था आएको हो।

५३ सदस्यीय प्रदेश सभामा बहुमतका लागि २७ सांसदको समर्थन आवश्यक हुन्छ। नागरिक उन्मुक्तिका सातै जना र राप्रपा तथा स्वतन्त्र सांसदलेसमेत समर्थन गरेको अवस्थामा उनले विश्वासको मत जुटाउन सक्थे।

कांग्रेसका १८ सहित नागरिक उनमुक्ति पार्टी (नाउपा)का ७, राप्रपा र स्वतन्त्र सांसदले मत दिए मात्र शाहलाई बहुमत पुग्दथ्यो।

सुदूरपश्चिम प्रदेशसभामा रञ्जिता पक्षधर नाउपाका दुई सांसद छन्। उनीहरू अनुपस्थित हुने सूचना पाएपछि मुख्यमन्त्री शाह विश्वासको मत लिने निर्णयबाट पछि हटेका हुन्।

नाउपाको विवाद नमिलेकाले स्वतन्त्र सांसद डा. तारा जोशीले विश्वासको मत नदिने निर्णय सार्वजनिक गरिसकेका छन्।