विप्लवको निर्णय : पूर्वमाओवादीसँग एकता र जनमतसंग्रह

काठमाडौँ- नेपाल कम्युनिस्ट पार्टी(नेकपा)ले पूर्वमाओवादीहरूबिच एकता गर्ने निर्णय गरेको छ। केन्द्रीय कार्यालय कपिलवस्तुको शिवगढीमा वैशाख पहिलो साता सम्पन्न केन्द्रीय समिति बैठकले यस्तो निर्णय गरेको हो।

बैठकका निर्णयबारे महासचिव नेत्रविक्रम चन्द ‘विप्लव’ले आगामी निर्वाचनलाई उपयोग गरेर जाने निर्णयसमेत भएको बताए।

‘विचार मिल्नेसँग एकता गर्दै जानुपर्छ। त्यसका लागि पहिला माओवादी धारसँग एकताबद्ध हुने गरी पार्टीले पहल गर्ने, त्यसपछि सबै कम्युनिस्ट पार्टीसँग पनि एउटै कम्युनिस्ट आन्दोलन निर्माणबारे बहस गर्ने,’ उनले भने, ‘बृहत् कम्युनिस्ट मोर्चा वा वाममोर्चा वा समाजवादी मोर्चा बनाउन मेहनत गर्नुपर्छ भन्ने विषयमा बैठकले निर्णय गरेको छ।’

साथै वृहत् समाजवादी आन्दोलनलाई सफल बनाउन आफ्नो दलले नेतृत्व गर्नेसमेत उनले जिकिर गरे।

समाजवादी संविधान बनाउने, बुर्जुवा गणतन्त्र कि साम्यवादी गणतन्त्र भन्नेमा जनमत सङ्ग्रह गर्ने र समाजवादी शक्ति निर्माण गरेका लागि सरकार, सदन र सडकबाट सङ्घर्ष गर्ने निर्णय भएको उनको भनाइ थियो।

यस्तै बैठकले देशको परिस्थिति अत्यन्तै अस्थिर र गम्भीर रहेको निष्कर्ष निकाल्दै एमसिसी, महँगी, भ्रष्टाचारविरुद्ध आन्दोलन चर्काउने निर्णय गरेको छ।

साम्यवादी व्यवस्था स्थापना गर्नका लागि चार मित्रशक्ति, चार मित्रवर्ग र ६ मित्र समुदायको अवधारणा नेकपाले ल्याएको छ।

कम्युनिस्ट, समाजवादी, देशभक्त र लोकतान्त्रिक गणतन्त्रवादी मित्रशक्ति हुन्। यिनलाई एकैठाउँ ल्याउन जोड गर्ने निर्णय नेकपाको छ।

किसान, मजदुर, मध्यम वर्ग र राष्ट्रिय पुँजीपतिवर्ग मित्रवर्ग हुन्। जनजाति, खस/आर्य, श्रमिक समुदाय, मधेश, मुस्लिम र महिला छन् मित्रसमुदाय भएकाले  उनीहरूसँगको सहकार्यमा मात्र नेपालको नयाँ राजनीतिक परिदृश्य निर्माण हुने विश्लेषण विप्लवको छ।