मधेशका मुख्यमन्त्री सिंहले पाए विश्वासको मत, पक्षमा ६७ र विपक्षमा ३४ सांसद उभिए

जनकपुरधाम– मधेश प्रदेशका मुख्यमन्त्री सतीशकुमार सिंहले विश्वासको मत पाएका छन्।

मुख्यमन्त्री सिंहका पक्षमा ६७ सांसदले विश्वासको मत प्रदान गरे। ३४ जना सांसदले भने सिंहको विपक्षमा मतदान गरेका हुन्।

शनिबार प्रदेशसभामा १०१ जना उपस्थितिमा सिंहले विश्वासको मत माग्दै प्रस्ताव पेस गरेका थिए।

मुखमन्त्रीका पक्षमा आएको उक्त मत प्रदेश सभाका कुल १०७ सदस्यसंख्याको बहुमत (५३ भन्दा बढी) भएकाले सिंहले विश्वासको मत प्राप्त गरेको सभामुखले घोषणा गरे।

सरकार गठन भएको ३० दिनभित्र विश्वासको मत लिनुपर्ने संवैधानिक व्यवस्थाअनुसार मुख्यमन्त्री सिंहले आगामी शनिबार प्रदेशसभामा विश्वासको मत लिएका हुन्।

मधेस प्रदेशसभामा चौथो ठूलो दलका रुपमा रहेको जनमत पार्टीका सिंहको नेतृत्वमा गत जेठ २५ गते प्रदेश सरकार गठन भएको थियो।

सिंहलाई एमाले, कांग्रेस, जनमत र लोपासका सांसदले विश्वासको मत दिएका थिए।

प्रदेशसभामा नेपाल कम्युनिस्ट पार्टी (एमाले)का २५, नेपाली कांग्रेसका २२, जनमत पार्टीका १३, जनता समाजवादी पार्टीका १९, लोसपाका ९, नेपाल कम्युनिस्ट पार्टी (माओवादी केन्द्र)का ९, नेपाल कम्युनिष्ट पार्टी (एकीकृत समाजवादी)का ७ प्रदेशसभा सदस्य छन्।

साथै राष्ट्रिय प्रजातन्त्र पार्टी, नेपाल समाजवादी पार्टी र नागरिक उन्मुक्ति पार्टीका एक/एक जना सदस्य छन्।

विश्वासको मत लिनुअघि मुख्यमन्त्री सिंहले शनिबार नै ४ दलका ६ मन्त्रीलाई बर्खास्त गरेका थिए।

बर्खास्तमा हुनेमा माओवादीका दुई, नेकपा एसका दुई, नागरिक उन्मुक्तिका एक र नेपाल संघीय समाजवादी पार्टीका एकएक जना मन्त्री परेका थिए। त्यसअघि मुख्यमन्त्री सिंहले सबै मन्त्रीलाई राजीनामा दिन आग्रह गरेका थिए। तर राजीनामा दिन नमानेका सबै मन्त्री बर्खास्त गरिएको मुख्यमन्त्री सिंहको सचिवालयले जानकारी दिएको छ।

मधेश सरकारमा माओवादीबाट संसदीय दलका नेता भरत साह अर्थमन्त्री र युवराज भट्टराई उद्योग वाणिज्य तथा पर्यटनमन्त्री थिए। उनीहरू दुवै जना बर्खास्तीमा परे।

नेकपा एसका संसदीय दलका नेता गोविन्द न्यौपाने भूमि व्यवस्था, कृषि तथा सहकारीमन्त्री र बेची लुंगेली ऊर्जा सिँचाइ तथा खानेपानीमन्त्री थिए। उनीहरूलाई पनि मुख्यमन्त्रीले बिदा गरिदिए।

यस्तै नागरिक उन्मुक्ति पार्टीकी एक मात्र सांसद उर्मिला चौधरी श्रम तथा रोजगारमन्त्री थिइन्। नेपाल संघीय समाजवादी पार्टीकी पनि एक्ली सांसद विमला अन्सारी गृह तथा सञ्चारमन्त्री थिइन्। उनीहरू दुवै जना बर्खास्तीमा परे।

सिंहले अब नेपाली कांग्रेस र लोसपालाई पनि सरकारमा सहभागी गराउने तयारी गरेका छन्।