कांग्रेसबाट को-को बन्लान् मन्त्री, यस्तो छ सम्भावित सूची

काठमाडौँ-  यतिबेला देशमा नयाँ सरकार गठनका बारेमा अनेकन आँकलन हूँदै छन्। नेपाली कांग्रेस र नेकपा एमालेमिलेर बनेको नयाँ समीकरणबाट आज प्रधानमन्त्रीमा केपी शर्मा ओली नियुक्त हुनेछन्।
केपी शर्मा ओली नियुक्त भएपछि मन्त्री मण्डल विस्तार हुने नै छ। त्यही मन्त्री मण्डलमा कांग्रेसबाट क–कसलाई पठाउने भन्ने बारे छलफल चलिरहेको छ।

प्रधानमन्त्रीले यो सरकारलाई दुईतिहाइको बनाउने प्रयत्न जारी राखेका कारण कांग्रेसले पाउने भनिएका १० मन्त्रालयमा दुई र एमालेले पाउने भनिएका ९ मन्त्रालयमध्ये दुई घटाएर साना दलको भाग बढाइदिने समझदारी कांग्रेस सभापति देउवासँग गरेका छन्।

पूर्वमहामन्त्री प्रकाशमान सिंहको नेतृत्वमा देउवाले कांग्रेसलाई सरकारमा पठाउँदै छन्। त्यसबाहेक संस्थापनबाट गृहमन्त्रालयसहित रमेश लेखक जानेछन् भने सहमहामन्त्री किशोरसिंह राठौरलाई पनि सकारमा पठाउने तयारी रहेको एक नेताले जानकारी दिए। ती नेताका अनुसार त्यसबाहेक नेपाली कांग्रेसका सभापति शेरबहादुर देउवाकी पत्नी आरजु राणा देउवा पनि सरकारमा जाने छन्।

देउवाले सांसद अजय चौरासियालाई पनि मन्त्री बनाउने ती नेताको भनाइ छ। कांग्रेस सभापति देउवाले पूर्वमहामन्त्री डा. शशांक कोइरालाको कोटामा दिपक खडकालाई मन्त्री बनाउन लागेको ती नेताले जानकारी दिए। उपसभापति पूर्णबहादुर खड्काको एकमात्र सिफारिसमा संसद्को राज्यव्यवस्था तथा सुशासन समितिको सभापति समेत रहेका सांसद रामहरि खतिवडाको नाम परेको छ। त्यो सिफारिस देउवा सहमत भएमा खतिवडा मन्त्री बन्नेछन्।

उता संस्थापनइतरबाट भने सहमहामन्त्री बद्री पाण्डे र जीवन परियारमध्ये एक, हृदयराम थानी, रामनाथ अधिकारी र दिपक गिरीमध्ये एकलाई सरकारमा पठाउने गृहकार्य भएको छ। शेखर पक्षका एक नेताका अनुसार यो पक्षबाट तेजुलाल चौधरी र सरिता प्रसाईंमध्ये एकजना मन्त्री बन्नेछन्।

संस्थापनइतरका अर्का नेताका अनुसार महामन्त्री गगन थापा मन्त्री नबन्ने भनेकाले उनले शेखर समूहमा एक मन्त्री छान्ने छन्। प्रदीप पौडेललाई मन्त्री बनाउने गगनको प्रस्तावमा शेखर सहमत भइसके पनि देउवा असहमत देखिएका छन्। त्यसैले अन्तिममा त्यो कोटामा अर्जुननरसिंह केसी मन्त्री बन्न सक्ने ती नेताको बुझाइ छ।

१० मन्त्रालय पाउदा चार डा. शेखर कोइराला समूहको भागमा छुट्टाउन तयार भएका देउवा अहिले दुईमा मिलाउन शेखरसँग अनुरोध गरिरहेका छन्। तर, शेखरले मानिरहेका छैनन्।

नेपाली कांग्रेसले पाउने मन्त्रालयको पनि अहिलेसम्म टुंगो लागेको छैन। तर, दुवैतर्फ समान्य खाका भने तयार भएको ती नेताले जानकारी दिए।