बागमतीका मुख्यमन्त्री लामाले पाए विश्वासको मत

हेटौँडा- बागमती प्रदेशका मुख्यमन्त्री बहादुरसिं लामाले प्रदेश सभाबाट विश्वासको मत पाएका छन्।

११० सदस्यीय प्रदेश सभाका बहुमत अर्थात् ६४ सांसदको मत लामाले पाएका हुन्।

मंगलबार प्रदेशसभा बैठकमा मुख्यमन्त्री लामाले विश्वासको मत लिनका लागि प्रस्ताव पेस गरेका थिए। संविधानको धारा १६८ को उपधारा (४) तथा प्रदेश सभा नियमावली २०७४ को नियम १४३ को उपनियम (१) बमोजिम उनले विश्वासको मतसम्बन्धी प्रस्ताव पेस गरेका थिए।

विश्वासको मत जुटाउनका लागि कम्तीमा पनि ५६ सांसदको समर्थन आवश्यक हुन्छ। नेपाली कांग्रेसका ३७ र नेकपा एमालेका २७ सांसदले प्रस्तावको पक्षमा मत दिएका छन्।

नेकपा माओवादी केन्द्र, नेकपा एकीकृत समाजवादी राप्रपा, हाम्रो नेपाली पार्टीका गरी ३५ सांसदले लामाको विपक्षमा मतदान गरे। मतदानमा नेमकिपा तटस्थ बसेको थियो। बैठकमा १०३ सांसद उपस्थित थिए।

केन्द्रमा कांग्रेस र एमालेबीच सहमति भएर केपी शर्मा ओलीको नेतृत्वमा सरकार बनेपछि बागमतीका तत्कालीन मुख्यमन्त्रीसमेत रहेका माओवादी केन्द्रका नेता शालिकराम जम्कट्टेलले राजीनामा दिएपछि लामा मुख्यमन्त्री बनेका हुन्।

मुख्यमन्त्रीसहित १३ मन्त्रालय रहेको बागमतीमा १४ सदस्यीय क्याबिनेट बनेको छ। एक जना मन्त्रीले मन्त्रालय नै पाएका छैनन्।